काठमाडौं (हाम्रो खेलकुद) – अलराउन्डर माइकल लिस्कको अर्धतकमा स्कटल्यान्डले आइसिसी विश्वकप लिग–२ त्रिकोणात्मक ओडिआई सिरिज अन्तर्गत नेपालविरुद्ध उत्कृष्ट पूनरागमन गरेको छ । टियु क्रिकेट मैदानमा टस हारेर पहिला ब्याटिङको निम्तो पाएको स्कटल्यान्डले ४० ओभरमा ७ विकेट गुमाउँदै १ सय ९३ रन बनाएको छ।

माइकल लिस्क ५७ बलमा २ चौका र ४ छक्कासहित ५३ रनमा अविजित छन् । एक समय १११–६ को अवस्थामा पुगेको स्कटल्यान्डलाई माइकल लिस्क र ज्याक जार्विसले ८१ रनको साझेदारी गरेपछि खेलमा उत्कृष्ट पूनरागमन गरेको छ । लिस्कले सोमपाल कामीलाई ३९ औं ओभरको अन्तिम दुई बलमा लगातार दुई छक्का हान्दै अर्धशतक पूरा गरेका थिए ।

४० औं ओभरको तेस्रो बलमा स्पिनर दीपेन्द्रसिंह ऐरीले डेब्यू खेल ज्याक जार्विसलाई २६ रनमा बोल्ड गर्दै साझेदारी तोडेका थिए । उनले ३८ बलमा १ चौका र १ छक्का हाने । स्कटल्यान्डका ओपनर कप्तान रिची बेरिंग्टन र क्रिसटोफेर म्याकबड्रीले पहिलो विकेटका लागि ७.४ ओभरमा ३४ रनको साझेदारी गरेका थिए ।

टियु एण्डबाट आएका स्पिनर कुशल मल्लले आठौं ओभरको चौथो बलमा कप्तान रिची बेरिंग्टनलाई १९ रनमा कट एण्ड बोल्ड आउट गर्दै नेपाललाई पहिलो सफलता दिलाएका थिए ।

बेरिंग्टनले २५ बलमा २ चौका प्रहार गरे । म्याकबड्री २२ रनमा आसिफ शेखबाट क्याच आउट भए । उनले २९ बलमा ३ चौका प्रहार गरे । त्यसपछि सन्दीप लामिछानेले दुई विकेट लिएका थिए ।

सन्दीपले प्रमुख ब्याटर म्याथ्यु क्रसलाई दुई रनमा एलबीडब्लू आउट गरे । टम म्याककिन्टसलाई सन्दीपले १९ रनमा एलबीडब्लू आउट गरे । डेब्यू खेल खेलेका उनले २८ बलमा २ चौका प्रहार गरे ।

कुशल भुर्तेलले २४ औं ओभरको दोस्रो बलमा क्रिस ग्रेभ्सलाई १६ रनमा विकेटकिपर आसिफ शेखबाट क्याच आउट गराएका थिए । पाँचौं विकेटका लागि क्रिस ग्रेभ्स र ब्रेन्डन म्याकमुलेनले ४६ रनको साझेदारी गरेका थिए ।

लगत्तै अर्को ओभरमा सन्दीपले म्याकमुलेनलाई कुशल मल्लबाट क्याच आउट गराएपछि २४.२ ओभरमा स्कटल्यान्ड १११–६ को अवस्थामा पुगेको छ ।