काठमाडौं (हाम्रो खेलकुद) – नेपालले आइसिसी विश्वकप लिग २ त्रिकोणात्मक ओडिआई सिरिजमा स्कटल्यान्डविरुद्ध चार विकेट गुमाएको छ। टियु क्रिकेट मैदानमा २ सय ७५ रनको विजयी लक्ष्य पछ्याएको नेपालले ९ ओभरमा ४ विकेट गुमाउँदै ६४ रन बनाएको छ । कुशल मल्ल १९ बलमा ३ चौकासहित १६ र सन्दीप जोरा १ रनमा क्रिजमा छन् ।

नेपालले तेस्रो ओभरमा कुशल भुर्तेल र ज्ञानेन्द्र मल्ल दुबैलाई गुमाएपछि लगातार खराब प्रदर्शन गरेको थियो । तीव्र गतिका बलर क्रिस सोलको तेस्रो ओभरको पहिलो बलमा कुशल भुर्तेल एज लागेर विकेटकिपर म्याथ्यु क्रसबाट १६ रनमा क्याच आउट भए ।
कुशल भुर्तेलले ८ बलमा ४ चौका हाने । ज्ञानेन्द्र मल्लले चौका हान्दै सुरुवात गरेका थिए । चौथो बलमा ज्ञानेन्द्र एज लागेर क्रसबाटै क्याच आउट भए ।

त्यसअघि इनिङको पहिलो ओभरमै सोलले २३ रन खर्चेका थिए । तेस्रो ओभरमा भने उनले खेल मोडेका थिए । पाँचौं ओभरमा आसिफ शेखलाई उनले ९ रनमा क्याच आउट गराए । कुशल मल्लले ब्यक्तिगत ६ रनमा जीवनदान पाएका थिए । तीव्र गतिका बलर ब्रेन्डन म्याकुमेलनको बलमा आठौं ओभरको चौथो बलमा कुशल मल्ल कट एण्ड बोल्ड आउट हुनबाट चुकेका थिए ।

कप्तान रोहित पौडेल ६ रनमा क्याच आउट भए । स्पिनर मार्क वाटको बलमा कट खेल्नेक्रममा रोहित प्वाइन्टमा ज्याक जार्विसबाट क्याच आउट हुन पुगेका थिए ।

त्यसअघि टस हारेर पहिला ब्याटिङको निम्तो पाएको स्कटल्यान्डले निर्धारित ५० ओभरमा ९ विकेट गुमाउँदै २ सय ७४ रन बनाएको थियो। माइकल लिस्कले ८५ बलमा ३ चौका र ९ छक्कासहित १ सय ७ रनको सानदार अविजित शतकीय इनिङ खेले । उनको यो करिअरको कुनैपनि संरचनाको पहिलो शतक हो ।

उनले ४८ औं ओभरको पाँचौं बलमा सोमपाल कामीलाई काउकर्नरमा छक्का र त्यसपछि एक रन बटुल्दै करिअरकै पहिलो शतक हानेका थिए । स्कटल्यान्डका लागि सातौं नम्बरका ब्याटर लिस्कले शतक हान्दै खेलमा नाटकीय पूनरागमन गराएका थिए ।

एक समय २४.२ ओभरमा १११–६ को दयनीय अवस्थामा पुगेको स्कटल्यान्डलाई माइकल लिस्कले अविश्वसनीय पूनरागमन गराउनेक्रममा विष्फोटक शतक हानेका थिए ।