काठमाडौं (हाम्रो खेलकुद) – नेपाली क्रिकेट टोलीका स्पिनर सन्दीप लामिछानेसँग स्कटल्यान्डका कुनैपनि खेलाडीले हात मिलाएनन् । आइसिसी विश्वकप लिग-२ त्रिकोणात्मक ओडिआई सिरिजमा नेपालसँग तीन विकेटले पराजित भएपछि पेभेलिएनबाट टोलीसँगै मैदान जानेक्रममा स्कटल्यान्डका खेलाडीले उनीसँग हात नमिलाएका हुन् ।

सन्दीप नेपालको टोलीको सबैभन्दा पछाडि थिए । तर स्कटल्यान्डका खेलाडीले खेलपछि हात भने मिलाउन माननेनन् । क्रिकेटमा जितपछि दुबै टोलीका खेलाडीले एक अर्कासँग हात मिलाउने संस्कार छ । तर स्कटल्यान्डका खेलाडीले भने नमिलाएका हुन् । खेल सुरु हुनुअघि स्कटल्यान्डले सन्दीप घटना बारे आफ्नो जानकारीमा रहेको जनाएको थियो ।

यसअघि मंगलबार नामिबियाका खेलाडीले भने सन्दीपसँग हात मिलाएका थिए । भदौ ५ गते काठमाडौंको एक होटलमा लगेर नाबालिगलाई बलात्कार गरेको आरोप सन्दीपमाथि लागेको थियो । भदौ २१ गते एक नाबालिगले सन्दीपले आफूलाई पटक पटक बलात्कार गरेको भन्दै प्रहरी वृत गौशालामा किटानी जाहेरी दिएकी थिइन ।

सन्दीपलाई पुष २८ मा उच्च अदालत पाटनले काठमाडौं जिल्ला अदालतको आदेश बदर गर्दै २० लाख धरौटीमा रिहा गर्न आदेश दिएको थियो । सन्दीपलाई क्रिकेट खेल्न पाउने वा नपाउने भने कुनै जानकारी दिएको छैन ।

जिल्ला अदालत काठमाडौंले सन्दीपलाई दोषी हो वा होईन त्यो फैसला गर्न बाँकी छ ।नामिबियाको खेलबाट सन्दीपले नेपाली टोलीमा पूनरागमन गरेका थिए । उक्त खेलमा नेपालले नामिबियालाई दुई विकेटले पराजित गरेको थियो । सन्दीपले उक्त खेलमा तीन विकेट लिएका थिए ।

जितको लागि २ सय ७५ रनको विजयी लक्ष्य पछ्याएको नेपालले ४७ ओभरमा ७ विकेट गुमाउँदै पूरा गर्यो । नेपालको जितमा दीपेन्द्र सिंह ऐरी १ सय १६ बलमा ८ चौका र १ छक्कासहित ८५ रनमा अविजित रहे । बायाँ हाते अलराउन्डर कुशल मल्लले ६७ बलमा ९ चौका र ४ छक्कासहित ८१ रनको उत्कृष्ट इनिङ खेले ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको स्कटल्यान्डले निर्धारित ५० ओभरमा ९ विकेट गुमाउँदै २ सय ७४ रन बनाएको थियो ।

स्कटल्यान्डका सातौं नम्बरका ब्याटर माइकल लिस्कले ८५ बलमा ३ चौका र ९ छक्कासहित १ सय ७ रनको सानदार अविजित शतकीय इनिङ खेलेपनि टोलीको हार टार्न सकेनन् । नेपालका सन्दीप लामिछानेले १० ओभरमा २७ रन खर्चेर ३ विकेट लिए ।