एजेन्सी – दक्षिण अफ्रिकामा जारी आइसिसी महिला टि२० विश्वकपमा इंग्ल्यान्डले भारतमाथि ११ रनको सहज जित हात पारेको छ । यो जितसँगै इंग्ल्यान्ड समूह बी बाट सेमिफाइनल नजिक पुगेको छ।

जितको लागि १ सय ५२ रनको विजयी लक्ष्य पछ्याएको भारतले निर्धारित २० ओभरमा ५ विकेट गुमाउँदै १ सय ४० रन बनायो । भारतकी ओपनर स्मृति मन्धनाले ४१ बलमा ७ चौका र १ छक्कासहित सर्वाधिक ५२ रन बनाइन् । विकेटकिपर रिचा घोष ३४ बलमा ४ चौका र २ छक्कासहित ४७ रनमा अविजित रहिन् ।

अन्य भारतीय ब्याटरले राम्रो प्रदर्शन गर्न सकेनन् । इंग्ल्यान्डकी सराह ग्लेनले ४ ओभरमा २७ रन खर्चेर २ विकेट लिइन् । लौरेन बेल र शोफी इक्लेस्टनले एक एक विकेट लिइन् ।

त्यसअघि जर्ज पार्कमा टस हारेर पहिला ब्याटिङको निम्तो पाएको इंग्ल्यान्डले निर्धारित २० ओभरमा ७ विकेट गुमाउँदै १ सय ५१ रन बनायो । इंग्ल्यान्डकी नाट स्कभर ब्रन्टले ४२ बलमा ५ चौकासहित सर्वाधिक ५० रन बनाइन् । विकेटकिपर एमी जोन्स २७ बलमा ३ चौका र २ छक्कासहित ४० र कप्तान हेथर नाइट २८ रनमा आउट भइन् ।

भारतकी तीव्र गतिकी बलर रेणुका सिंहले ४ ओभरमा १५ रन खर्चेर ५ विकेट लिएपनि भारतको हार टार्न सकिनन् । शिखा पाण्डे र दिप्ती शर्माले एक एक विकेट लिइन् ।

इंग्ल्यान्ड समूह बी मा ३ खेलमा ६ अंकका साथ शीर्ष स्थानमा छ । भारत ३ खेलमा २ मा जित र १ मा हारसहित दोस्रो स्थानमा छ । पाकिस्तान २ खेलमा १ मा जित र १ मा हारसहित २ अंकका साथ तेस्रो स्थानमा छ ।

समूह ए मा अष्ट्रेलिया ३ खेलमा ६ अंकका साथ शीर्ष स्थानमा छ । श्रीलंका ३ खेलमा २ मा जित र १ मा हारसहित ४ अंकका साथ दोस्रो स्थानमा छ ।