एजेन्सी – ओपनर मोहम्मद वासिमको विष्फोटक ब्याटिङमा घरेलु टोली युएईले दोस्रो टि२० आई खेलमा अफगानिस्तानमाथि ९ विकेटको सानदार जित हात पारेको छ । योसँगै तीन टि२० आई खेलको सिरिज १-१ को बराबरी अवस्थामा पुगेको छ ।

जितको लागि १ सय ३८ रनको विजयी लक्ष्य पछ्याएको युएईले १८.२ ओभरमा १ विकेट गुमाउँदै पूरा गर्यो । युएईको जितमा मोहम्मद वासिमले ५० बलमा ८ चौका र ७ छक्कासहित ९१ रनको विष्फोटक इनिङ खेले ।

करिम जन्नतको बलमा ठूलो सट खेल्ने धुनमा डिप एक्स्ट्रा कभरमा राशिद खानबाट क्याच आउट भएपछि टि२० आई करिअरको तेस्रो शतक बनाउन ९ रनले चुकेका थिए । वृत्य अरविन्द ४६ बलमा २ चौकासहित ३८ र सिपी रिजवान ९ रनमा अविजित रहे ।

त्यसअघि शेख जायद स्टेडियम आबुधाबीमा टस जितेर पहिला ब्याटिङ थालेको अफगानिस्तानले निर्धारित २० ओभरमा ६ विकेट गुमाउँदै १ सय ३७ रन बनाएको थियो । अफगानिस्तानका नाजिबउल्लाह जद्रान २९ बलमा ५ चौक र १ छक्कासहित सर्वाधिक ३७ रनमा अविजित रहे ।

अफगानिस्तानका ओपनर रहमानउल्लाह गुरबाज जुनदै सिद्दिकको तेस्रो ओभरको अन्तिम बलमा बासिल हमिदबाट १५ रनमा क्याच आउट भए । जहुरु खानले इब्राहिम जद्रानलाई एक रनमा क्याच आउट गर्दै युएईलाई राम्रो सुरुवात दिलाएका थिए । ओपनर हज्रतुल्लाह जजाई २७, अस्फार जजाई १८, करिम जन्नत ७, आजमतुल्लाह ओमरजाई १२ र राशिद खानले १४ रन बनाए ।
युएईका जहुरु खानले ४ ओभरमा २५ रन खर्चेर २ विकेट लिए । जवार फरिद ४ ओभरमा ३१ रन खर्चेर २ विकेट लिए । जुनैद सिद्दिक र अकिफ राजाले एक एक विकेट लिए । पहिलो खेलमा अफगानिस्तान पाँच विकेटले विजयी भएको थियो । तेस्रो खेल आइतबार हुनेछ।