काठमाडौं (हाम्रो खेलकुद) – नेपाली क्रिकेट टोलीका अनुभवी ब्याटर ज्ञानेन्द्र मल्लले युवा ओपनर आसिफ शेखसँग ब्याटिङ गर्दा सहज लाग्ने बताएका छन् । नामिबियालाई दोस्रो खेलमा तीन विकेटले पराजित गर्न कीर्तिमानी शतकीय साझेदारी गरेपछि ज्ञानेन्द्र मल्लले उत्कृष्ट प्रतिक्रिया दिएका हुन् ।

जितको लागि २ सय ७५ रनको विजयी लक्ष्य पछ्याएको नेपालले ४७.३ ओभरमा ७ विकेट गुमाउँदै पूरा गर्यो । नेपालको जितमा आसिफ शेखले ८१ र ज्ञानेन्द्र मल्लले ६५ रनको योगदान दिए । दोस्रो विकेटका लागि ज्ञानेन्द्र मल्ल र आसिफ शेखले १ सय ३९ रनको साझेदारी गरेका थिए ।

जुन ओडिआईमा नेपालबाट कुनैपनि विकेटका लागि बनेको उच्च साझेदारी थियो । त्यसअघि नामिबियाविरुद्ध नै पहिलो खेलमा रोहित पौडेल र कुशल भुर्तेलले तेस्रो विकेटका लागि १ सय ३३ रनको साझेदारी गरेका थिए ।

‘आसिफसँग ब्याटिङ गर्दा सहज हुन्छ । उ आफैं स्टोक प्लेयर हो । सुरुवात पाएपछि बलरहरुलाई दबाबमा राखेर खेल्छ । त्यसले गर्दा सजिलो हुन्छ । यो मात्रै होईन हामीले दुई तीन वटा राम्रो साझेदारी पनि गरेका छौं । तर कीर्तिमानको लागि बधाई छ’, हाँस्दै ज्ञानेन्द्रले भने ।

आसिफ र ज्ञानेन्द्रले यसअघि गत नोभेम्बरमा युएईविरुद्ध १ सय २२ रनको शतकीय साझेदारी गरेका थिए । २०२१ मा ओमानविरुद्ध ९५ रनको साझेदारी गरेका थिए । नेपालबाट ज्ञानेन्द्रले ७ र आसिफले ६ ओडिआई अर्धशतक प्रहार गरेका छन् ।
नेपालले तीनै खेलमा सानदार ब्याटिङका साथ उत्कृष्ट जित हात पारेको छ ।

नेपालले पहिलो खेलमा नामिबियाविरुद्ध २ सय ८६ रनको विजयी लक्ष्य ८ विकेट गुमाउँदै पूरा गरेको थियो । जुन ओडिआईमा पूरा गरेको उच्च योगफल थियो । स्कटल्यान्डले दिएको २ सय ७५ रनको लक्ष्य नेपालले ७ विकेट गुमाउँदै पूरा गरेको थियो । ज्ञानेन्द्र मल्ल पिच ब्याटिङ सहयोगी रहेको बताउँछन् ।

‘हामीले पहिला त विकेट (पिच) लाई मान्नुपर्छ । विकेट पहिला भन्दा धेरै राम्रो खेलेको छ । पहिला देखि सुरुवात गरि अहिलेसम्म आउँदा खेलाडीहरुमा जिम्मेवारी बढेको छ । फेरि नयाँ वातावरण बनेको छ । पहिलोमा राम्रो गर्दा दोस्रोमा गर्न सहज भयो । दोस्रोमा राम्रो गर्दा तेस्रो खेलमा राम्रो भयो । जो पनि जान सक्छ र खेल जिताउन सक्छ भन्ने आत्माविश्वासको विकास भएको छ’, जितपछि ज्ञानेन्द्र मल्लले भने ।

‘अरु विकेटको हेर्ने हो भने हामीले राम्रो विकेटमा राम्रो गरेका थियौं । नराम्रो पनि गरेका थिएनौं । फरक विकेटमा हामीले स्कोर गर्न सकेका थिएनौं । नेपालमा अहिले लिग–२ को दोस्रो सिरिज खेलेका थियौं । ड्रेसिङ रुममा पनि प्रशिक्षक मोन्टी देशाईले सहजता ल्याईदिनु भएको छ । आत्माविश्वास बढाईदिनु भएको छ । यी सानो सानो कुराले काम गरेका छन्’, ज्ञानेन्द्रले भने ।

नेपालले यस सिरिज खेल्नुअघि १२ खेलमा ९ खेल जित्नुपर्ने दबाब थियो । लगातार तीन खेल जितेपछि नेपालको शीर्ष पाँचमा रहँदै ओडिआई मान्यता पक्का गर्ने सम्भावना बढेको छ । ज्ञानेन्द्र सधैं सम्भावना रहेको बताउँछन् ।

‘ओडिआई मान्यता बचाउने जहिले पनि मौका थियो । १२ खेल सुरु हुनुभन्दा अघिनै हामीले गणना गरि रहेका थियौं । एउटा खेलको रुपमा लिनुपर्छ । वहाँबाट गएपछि नेपालको फरक ठाउँ र पिचमा खेल हुन्छ । एउटा खेल र सिरिजलाई लिएर गयो भने पक्कैपनि ओडिआई मान्यता हुन्छ’, उनले भने ।

जव ज्ञानेन्द्र २५ देखि ३० को आसपासमा पुग्छन् तव आउट हुने डर बढी हुन्छ । ‘म पहिला त सकरात्मक सोचमै लिन्छु । टिमलाई २५–३० रन बनाउँदै सुरुवातमा सहयोग दिई राखेको हुन्छ । तर कहिले काहिँ सुरुवात पुगेको हुँदैन । तर हिजो अस्ति अरुले ब्याटिङ गरि रहेको थियो । त्यसपछि मलाई के अनुभव भएको थियो भने गरे सकिने रहेछ भन्ने आत्माविश्वास बढेकोछ । रन त सधैं हान्नुपर्छ । जहिले पनि नेपाललाई जिताउनु छ भन्ने हुन्छ । प्रतिस्पर्धा भन्दा पनि आ–आफ्नो भूमिकाको कुरा हो । म छैन भने अर्को भाइ पनि जित्ने भावना ले नै जान्छ’, ज्ञानेन्द्रले भने । नेपालले अव मंगलबार स्कटल्यान्डसँग खेल्नेछ । त्यसपछि युएई भ्रमणमा जानेछ ।