एजेन्सी – अलरान्डर करिम जन्नतको आक्रामक ब्याटिङमा अफगानिस्तानले तेस्रो टि२० आई खेलमा घरेलु टोली युएईलाई ६ विकेटले हराउँदै सिरिज जितेको छ । अफगानिस्तानले तीन टि२० आई खेलको सिरिज २–१ ले जितेको हो ।

जितको लागि १ सय ६४ रनको विजयी लक्ष्य पछ्याएको अफगानिस्तानले १९.१ ओभरमा ४ विकेट गुमाउँदै पूरा गर्यो । अफगानिस्तानको जितमा करिम जन्नत २२ बलमा ४ चौका र ५ छक्कासहित ५६ रनमा अविजित रहे ।

इब्राहिम जद्रान ५१ बलमा ५ चौका र १ छक्कासहित ६० रनमा अविजित रहे । ओपनर रहमानउल्लाह गुरबाज २० र अफ्सर जजाई १३ रनमा आउट भए । युएईका जहुर खानले ४ ओभरमा २८ रन खर्चेर २ विकेट लिए । अकिफ राजा जवार फरिदले एक एक विकेट लिए ।

त्यसअघि शेख जायद स्टेडियम आबुधाबीमा टस हारेर पहिला ब्याटिङको निम्तो पाएको युएईले निर्धारित २० ओभरमा ६ विकेट गुमाउँदै १ सय ६३ रन बनायो । युएईका ओपनर मोहम्मद वासिम ५० बलमा ८ चौका र ३ छक्कासहित ७५ रनमा आउट भए । दोस्रो खेलमा अफगानिस्तानलाई ९ विकेटले हराउन वासिमले ९१ रनको इनिङ खेलेका थिए ।

अर्का ओपनर वृत्य अरविन्दले ५३ बलमा ७ चौका र १ छक्कासहित ५९ रन बनाए । पहिलो विकेटका लागि वासिम र अरविन्दले १५.४ ओभरमा १ सय २९ रनको शतकीय साझेदारी गर्दै उत्कृष्ट सुरुवात दिलाएका थिए ।

त्यसपछि भने लगातार विकेट गुमाउन पुगेपछि विशाल योगफल बनाउनबाट चुकेको थियो । कप्तान राशिद खानले ४ ओभरमा १६ रन खर्चेर २ विकेट लिए । गुलबदीन नाइबले २ ओभरमा १३ रन खर्चेर २ विकेट लिए । नविन उल हकले एक विकेट लिए ।