एजेन्सी – श्रीलंका दक्षिण अफ्रिकामा जारी आइसिसी महिला टि२० विश्वकपमा न्युजिल्यान्डसँग ६० रनमा अल आउट भएको छ । न्युजिल्यान्डसँग १ सय २ रनको फराकिलो हारसँगै श्रीलंका समूह ए बाट नै बाहिरिएको छ।

जितको लागि १ सय ६३ रनको विजयी लक्ष्य पछ्याएको श्रीलंका १५.५ ओभरमा ६० रनमा अल आउट भयो । श्रीलंकाकी कप्तान चामरी अथापथुले २१ बलमा सर्वाधिक १९ रन बनाइन् । मासशा शेहानीले १० रन बनाइन् । अन्य कुनैपनि श्रीलंकन ब्याटरले दोहोरो अंकमा रन बनाउन सकेनन् ।

न्युजिल्यान्डकी अमेलिया केर र लेआ केरले दुई दुई विकेट लिइन् । त्यसअघि बोलान्ड पार्कमा टस जितेर पहिला ब्याटिङ थालेको न्युजिल्यान्डले २० ओभरमा ३ विकेट गुमाउँदै १ सय ६२ रन बनाएको थियो । न्युजिल्यान्डकी अमेलिया केरले ४८ बलमा ६ चौकासहित सर्वाधिक ६८ रन बनाइन् । सुजी बेट्सले ४९ बलमा ६ चौकासहित ५६ रन बनाइन् ।

समूह ए बाट अष्ट्रेलिया ४ खेलमा अपराजित रहँदै ८ अंकका साथ शीर्ष स्थानमा रहँदै सेमिफाइनलमा पुगेको छ । न्युजिल्यान्ड ४ खेलमा २ मा जित र २ मा हारसहित ४ अंकका साथ दोस्रो स्थानमा छ । न्युजिल्यान्डको नेटरनरेट ०.१३८ छ ।

श्रीलंका ४ खेलमा २ मा जित र २ मा हारसहित तेस्रो स्थानमा छ । श्रीलंकाको नेटरनरेट माइनस १.४६० छ । दक्षिण अफ्रिका ३ खेलमा १ मा जित र २ मा हारसहित चौथो स्थानमा छ । दक्षिण अफ्रिकाले मंगलबार बंगलादेशसँग खेल्नेछ । उक्त खेलमा विजयी हुँदा दक्षिण अफ्रिका नेटरनरेटको कारण सेमिफाइनलमा पुग्नेछ । दक्षिण अफ्रिका पराजित हुँदा न्युजिल्यान्ड सेमिफाइनलमा पुग्नेछ।

यता समूह बी मा इंग्ल्यान्ड ३ खेलमा ६ अंकका साथ शीर्षस्थानमा छ । भारत ३ खेलमा २ मा जित र १ मा हारसहित ४ अंकका साथ दोस्रो स्थानमा छ । पाकिस्तान ३ खेलमा १ मा जित र २ मा हारसहित चौथो स्थानमा छ । इंग्ल्यान्डको सेमिफाइनल स्थान पक्का छ । भारतले आज आयरल्यान्डसँग खेल्नेछ । भारत पराजित भएको खण्डमा भने पाकिस्तानको सेमिफाइनल सम्भावना खुल्नेछ । भारत विजयी हुँदा भने पाकिस्तान बाहिरिनेछ ।