काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा स्कटल्यान्डविरुद्ध मध्यम विजयी लक्ष्य पछ्याउनेक्रममा दुवै ओपनरलाई गुमाएको छ।

जितको लागि २ सय १३ रनको विजयी लक्ष्य पछ्याएको नेपालले ९ ओभरमा २ विकेट गुमाउँदै २९ रन बनाएको छ । नेपालका ज्ञानेन्द्र मल्ल २३ बलमा ३ चौकासहित १६ र रोहित पौडेलले उनलाई साथ दिएका छन् ।

नेपालले दोस्रो ओभरमै ओपनर कुशल भुर्तेलाई एक रनमा गुमायो । स्पिनर मार्क वाटको दोस्रो ओभरको पहिलो बलमै एलबीडब्लू आउट गरेका थिए । तीव्र गतिका बलर ब्रेन्डन म्याकमलनको बलमा आसिफ शखे १२ रनमा काइल कोट्जरबाट क्याच आउट भए । आसिफले २३ बलमा १ चौका हाने ।

त्यसअघि टयु क्रिकेट मैदानमा टस हारेर पहिला ब्याटिङको निम्तो पाएको स्कटल्यान्ड ४६.१ ओभरमा २ सय १२ रनमा अल आउट भएको थियो । स्कटल्यान्डका ओपनर जर्ज मुन्शे ५० बमा ९ चौका र २ छक्कासहित सर्वाधिक ६० रनमा आउट भए । मुन्शे बाहेक अन्य कुनैपनि स्कटल्यान्डका ब्याटरले राम्रो प्रदर्शन गर्न सकेनन् ।

मुन्शे सन्दीपको बलमा बोल्ड भएका थिए । मुन्शे आउट हुनुअघि स्कटल्यान्ड १३.४ ओभरमा ८९–१ को बलियो अवस्थामा थियो । मुन्शेको विकेटपछि इनिङ धरासयी बनेको थियो । मुन्शे १४ औं ओभरको पाँचौं बलमा सन्दीपलाई लगातार तीन चौका हान्ने आक्रममा बोल्ड हुन पुगेका थिए ।

नेपालका सन्दीप लामिछानले १० ओभरमा ४५ रन खर्चेर ४ विकेट लिए । करण केसीले ८।१ ओभरमा ४२ रन खर्चेर ३ विकेट लिए । नेपालले पहिलो खेलमा स्कटल्यान्डलाई तीन विकेटले हराएको थियो । नेपाल पहिलो पटक चार खेलमा चार नै जित्ने सोचमा छ ।