काठमाडौं (हाम्रो खेलकुद) – कप्तान रोहित पौडेल र करण केसीको उत्कृष्ट ब्याटिङमा नेपालले आइसिसी विश्वकप लिग–२ त्रिकोणात्मक ओडिआई सिरिजमा च्याम्पियन स्कटल्यान्डमाथि दुई विकेटको रोमान्चक जित हात पारेको छ । योसँगै नेपालले विश्वकप लिग २ मा पहिलो पटक सबै चार खेल जित्न सफल भएको छ ।

जितको लागि २ सय १३ रनको विजयी लक्ष्य पछ्याएको नेपालले ४४.१ ओभरमा ८ विकेट गुमाउँदै पूरा गर्यो । नेपालको जितमा कप्तान रोहित पौडेल १ सय १ बलमा ७ चौका र ४ छक्कासहित ९५ रनमा अविजित रहे । करण केसी ३७ बलमा २ चौका र १ छक्कासहित ३१ रनमा अविजित रहे ।

नेपालले यस सिरिजमा चारै खेल जितेको हो । लिग २ मा नेपालले पहिलो पटक चारै खेल जितेको हो । एक समय ३१.५ ओभरमा १३८–८ को दयनीय अवस्थामा पुगेको नेपाललाई करण केसी र रोहित पौडेलले नवौ विकेटका लागि ७५ रनको साझेदारी गर्दै रोमान्चक जित दिलाएका हुन् । कप्तान रोहितले विजयी चौका प्रहार गर्दै खेल सकाएका थिए ।

यसअघिका तीन खेलमा सानदार ब्याटिङ गरेपनि स्कटल्यान्डविरुद्ध नेपालले सुरुवात देखिनै खराब प्रदर्शन गरेको थियो । नेपालले दोस्रो ओभरमै ओपनर कुशल भुर्तेलाई एक रनमा गुमाएको थियो । स्पिनर मार्क वाटको दोस्रो ओभरको पहिलो बलमै कुशल एलबीडब्लू आउट हुन पुगे । तीव्र गतिका बलर ब्रेन्डन म्याकमलनको बलमा आसिफ शखे १२ रनमा काइल कोट्जरबाट क्याच आउट भए ।

स्पिनर मार्क वाटले अनभुवी ब्याटर ज्ञानेन्द्र मल्ललाई २१ रनमा एलबीडब्लू आउट गरे । ज्ञानेन्द्रले ३० बलमा ४ चौका हाने । त्यो समय नेपाल १०.३ ओभरमा ३४–३ को अवस्थामा पुगेको थियो ।

स्पिनर क्रिस ग्रेभ्सले कुशल मल्ललाई १७ रनमा बोल्ड आउट गरे । छैटौं विकेटका लागि दीपेन्द्र र रोहितले ४४ रनको साझेदारी गरेका थिए । दीपेन्द्र ग्रेभ्सकै बलमा ७ रनमा बोल्ड आउट भए । मार्क वाटले सोमपाललाई २ रनमा आउट गरे । सन्दीप ९ रनमा क्याच हुँदा नेपाल १३८–८ को दयनीय अवस्थामा पुगेको थियो ।

स्कटल्यान्डका क्रिस ग्रेभ्सले १० ओभरमा ६१ रन खर्चेर २ विकेट लिए । मार्क वाटले १० ओभरमा १ मेडनसहित २९ रन खर्चेर ३ विकेट लिए । ब्रेन्डन म्याकुमेलन, शफ्यान शरिफ र माइकल लिस्कले एक एक विकेट लिए ।

त्यसअघि टयु क्रिकेट मैदानमा टस हारेर पहिला ब्याटिङको निम्तो पाएको स्कटल्यान्ड ४६.१ ओभरमा २ सय १२ रनमा अल आउट भएको थियो । स्कटल्यान्डका ओपनर जर्ज मुन्शेले ५० बमा ९ चौका र २ छक्कासहित सर्वाधिक ६० रनको योगदान दिए । नेपाली बलर सामु मुन्शे बाहेक अन्य कुनैपनि स्कटल्यान्डका ब्याटरले रन बनाउन सकेनन् ।

मुन्शे सन्दीपको बलमा बोल्ड हुनुअघि स्कटल्यान्ड १३.४ ओभरमा ८९–१ को बलियो अवस्थामा थियो । मुन्शे आउट भएपछि लगातार विकेट गुमाएको थियो। स्कटल्यान्डका ब्याटर नेपाली स्पिनरलाई रिभरस्वीप र स्विप खेल्ने धुनमा विकेट गुमाउन पुगेका थिए ।

मुन्शे आउट भएको लगत्तै अर्को बलमा कप्तान रिची बेरिंगटनलाई एलबीडब्लू आउट गर्दै सन्दीप ह्याट्रिक नजिक पुगेका थिए । १६ औं ओभरको पहिलो बलमा म्याथ्यु क्रसले दुई रन दिएपछि सन्दीप ह्याट्रिक गर्नबाट असफल भएका थिए ।

पहिलो विकेटका लागि ओपनर जर्ज मुन्शे र काइल कोट्जरले ७.५ ओभरमा ४२ रनको साझेदारी गरेका थिए । स्पिनर सन्दीप लामिछानेले टियु एण्डबाट बलिङ गर्दै कोट्जरलाई २२ रनमा एलबीडब्लू आउट गर्दै नेपाललाई पहिलो सफलता दिलाएका थिए ।

सन्दीपको सामना गरेको पहिलो बलमै कोट्जर रिभरस्वीप खेल्ने धुनमा आउट भएका थिए । त्यसअघि लगातार दुई चौका हान्दै एक रन लिएर मुन्शेले स्ट्राइक दिएका थिए । कोट्जरले २३ बलमा ४ चौका हानेका थिए ।

कुशल मल्लले २१ औं ओभरको दोस्रो बलमा क्रिसटोफर म्याकब्राइडलाई २२ रनमा एलबीडब्लू आउट गरे । म्याकब्राइड पनि स्वीप शट खेल्ने चक्करमा आउट भएका थिए । सन्दीपले २२ औं ओभरको तेस्रो बलमा टम म्याकिन्टसलाई एक रनमा सन्दीप जोराबाट क्याच आउट गराए ।

दीपेन्द्रसिंह ऐरीले म्याथ्यु क्रसलाई ४२ रनमा डाइरेक्ट थ्रोमा रन आउट गरे । क्रसले ६३ बलमा ४ चौका र १ छक्का प्रहार गरेका थिए । छैटौं विकेटका लागि क्रस र ब्रेन्डन म्याकुमेलन ५७ रनको साझेदारी गरेका थिए । ब्रेन्डन म्याकमलन ४८ बलमा ३ चौकासहित ३१ रनमा क्याच आउट भए ।

नेपालका सन्दीप लामिछानले १० ओभरमा ४५ रन खर्चेर ४ विकेट लिए । ललितनारायण राजवंशीले १० ओभरमा १ मेडनसहित ३३ रन खर्चेर १ विकेट लिए । कुशल मल्लले ६ ओभरमा ३० रन खर्चेर १विकेट लिए । करण केसीले ८.१ ओभरमा ४२ रन खर्चेर ३ विकेट लिए ।

स्कटल्यान्ड नेपालसँग पहिलो खेलमा तीन विकेटले पराजित भएको थियो । नामिबियालाई १० विकेट र ४३ रनले पराजित गरेको थियो । नेपालले भने नामिबियालाई तीन र दुई विकेटले पराजित गरेको थियो ।

अंक तालिका

स्कटल्यान्ड ३६ खेलमा २४ मा जित र १० मा हारका साथ ५० अंकका साथ शीर्ष स्थानमा रहँदै अन्त्य गर्यो । ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । नामिबिया ३४ खेलमा १८ मा जित र १५ मा हारका साथ ३७ अंकका साथ तेस्रो स्थानमा छ ।

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । युएई २६ खेलमा १२ मा जित र ११ मा हारसहित २७ अंकका साथ पाँचौं स्थानमा छ ।

नेपाल २८ खेलमा १२ मा जित र १४ मा हारसहित २६ अंकका साथ छैटौं स्थानमा छ । पपुवा न्युगिनी २८ खेलमा २ मा जित र २५ मा हारसहित ५ अंक जोड्दै पुछारमा छ । शीर्ष तीन टोली सोझै ग्लोबल छनोट खेल्नेछन् । ओमान र स्कटल्यान्ड सोझै विश्वकप छनोटमा पुगेका छन् । बाँकी चार टोलीले प्लेअफ खेल्नुपर्ने हुन्छ ।