काठमाडौैं (हाम्रो खेलकुद) – आइसिसी विश्वकप लिग–२ उपाधि विजेता स्कटल्यान्डले च्याम्पियन ट्रफी मंगलबार टियु क्रिकेट मैदानमा पाएको छ । अन्तर्राष्ट्रिय क्रिकेट परिषद् (आइसिसी) ले च्याम्पियन स्कटल्यान्डलाई टियु मैदानमा ट्रफी प्रदान गरेको छ ।

आइसिसीका आईसीसी ग्लोबल डेभलपमेन्ट प्रमुख विलियन ग्लेनराइटले स्कटल्यान्डका खेलाडीलाई नेपालसँगको खेलपछि लिग २ च्याम्पियन ट्रफी प्रदान गरेका थिए ।

स्कटल्यान्ड अन्तिम खेलमा भने नेपालसँग दुई विकेटले पराजित भयो । २०१९ देखिसुरु भएको आइसिसी विश्वकप लिग–२ मा कुल ७ देशले प्रतिस्पर्धा गरेका थिए । स्कटल्यान्डले नामिबियालाई १० विकेटले हराउँदै तीन खेल अगावै उपाधि जितेको थियो ।

हरेक टोलीले कुल ३६ खेल खेल्ने गर्दछन् । हरेक टोलीले त्रिकोणात्मक ओडिआई सिरिज गरि एक टोलीसँग कुल ६ खेल खेल्ने गर्दछन् । स्कटल्यान्ड ३६ खेलमा २४ मा जित र १० मा हारसहित ५० अंकका साथ शीर्ष स्थानमा रहँदैअन्त्य गर्यो ।

पुरै ३६ खेल सक्ने स्कटल्यान्ड ओमान र अमेरिकापछि तेस्रो टोली बनेको छ। ओमान सबैभन्दा पहिला लिग–२ मा आफ्नो सबै ३६ खेल सक्ने टोली हो । ओमान ३६ खेलमा २१ मा जित र १३ मा हारसहित ४४ अंकका साथ दोस्रो स्थानमा छ । स्कटल्यान्ड र ओमान आगमी जुन जुलाईमा जिम्बावेमा हुने आइसिसी एकदिवसीय विश्वकप छनोटको लागि सोझै पुगेका छन् ।

सोझै विश्वकप छनोट खेल्न अव नेपाल, युएई र नामिबियाबीच प्रतिस्पर्धा छ । यी तीन देश मध्य एकले सोझै छनोटमा स्थान बनाउनेछ । पुछारका चार टोलीले नामिबियामा मार्च अप्रिलमा हुने प्लेअफ क्वालिफायर खेल्नुपर्ने हुन्छ । प्लेअफ क्वालिफायरमा लिग–२ का पुछारका चार टोलीसँगै क्यानडा र जर्सी हुनेछन् ।

जसबाट शीर्ष दुई टोली एकदिवसीय छनोट खेल्न पाउनेछन् । नामिबिया ३४ खेलमा १८ मा जित र १५ मा हारसहित ३७ अंकका साथ तेस्रो स्थानमा छ । शीर्ष तीनमा पर्न नामिबियाले सबै खेल जित्नुपर्ने हुन्छ । युएईको नतिजामा पनि निर्भर रहनुपर्ने हुन्छ । अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ।

अमेरिका शीर्ष तीनमा नपर्ने पक्का भई सकेको छ । युएई २६ खेलमा १२ मा जित र ११ मा हारसहित २७ अंकका साथ पाँचौं स्थानमा छ । नेपाल २८ खेलमा १२ मा जित र १४ मा हारसहित २६ अंक जोड्दै पाँचौं स्थानमा छ । पपुवा न्युगिनी २८ खेलमा २ मा जित र २५ मा हारसहित ५ अंक जोड्दै पुछारमा छ ।

नेपाल शीर्ष तीनमा रहँदै सोझै विश्वकप छनोट खेल्न बाँकी आठ खेल नै जित्नुपर्ने हुन्छ । नेपालले यसै साता युएईमा गएर युएई र पपुवा न्युगिनीसँग समान दुई दुई खेल खेल्नेछ । त्यस सिरिजपछि घरेलु मैदान टियुमा युएई र पपुवा न्युगिनीसँग दुई दुई खेल खेल्नेछ ।