एजेन्सी – घरेलु टोली दक्षिण अफ्रिकाले आइसिसी महिला टि२० विश्वकप २०२३ को दोस्रो सेमिफाइनल खेलमा इंग्ल्यान्डलाई ६ रनले पराजित गर्दै फाइनलमा पुगेको छ । दक्षिण अफ्रिकाले आइतबार फाइनलमा अष्ट्रेलियासँग प्रतिस्पर्धा गर्नेछ ।

जितको लागि १ सय ६५ रनको विजयी लक्ष्य पछ्याएको इंग्ल्यान्डले निर्धारित २० ओभरमा ८ विकेट गुमाउँदै १ सय ५८ रन बनाउन सक्यो । इंग्ल्यान्डकी नाट स्काभर ब्रन्टले ३४ बलमा ५ चौकासहित सर्वाधिक ४० रन बनाइन् । एक समय इंग्ल्यान्ड १७ ओभरमा १३७–४ को बलियो अवस्थामा थियो ।

जितको लागि १८ बलमा २८ रन चाहिँएको थियो । तर दक्षिण अफ्रिकाकी अयाबाेंगा खाकाले १८ औं ओभरमा मात्रै ३ रन खर्चेर ३ विकेट लिएपछि खेलले नयाँ मोड लिएको थियो ।

ओपनर ड्यानी व्याट ३४, शोफिया डंकली २८ र हेथर नाइट ३१ रन बनाइन् । अन्य कुनैपनि ब्याटरले राम्रो प्रदर्शन गर्न सकेनन् । दक्षिण अफ्रिकाकी खाकाले ४ ओभरमा २९ रन खर्चेर ४ विकेट लिइन् । सबनिम इस्मालीले ४ ओभरमा २७ रन खर्चेर ३ विकेट लिइन् ।

त्यसअघि केप टाउनमा टस जितेर पहिला ब्याटिङ रोजेको दक्षिण अफ्रिकाले निर्धारित २० ओभरमा ४ विकेट गुमाउँदै १ सय ६४ रन बनाएको थियो । दक्षिण अफ्रिकाकी ताज्मी ब्रिट्सले ५५ बलमा ६ चौका र २ छक्कासहित सर्वाधिक ६८ रन बनाइन् । लौरा वोल्वार्ड्टले ४४ बलमा ५ चौका र १ छक्कासहित ५३ रन बनाइन् ।

पहिलो विकेटका लागि लौरा र ताज्मीले १३.४ ओभरमा ९६ रनको साझेदारी गर्दै राम्रो सुरुवात दिलाएका थिए । मरिजान कैपले १३ बलमा ४ चौकासहित २७ रन बनाइन् । इंग्ल्यान्डकी शोफी एक्लेस्टोनले ४ ओभरमा २२ रन खर्चेर २ वकेट लिइन् ।
पहिलो सेमिफाइनल खेलमा अष्ट्रेलियाले भारतलाई ५ रनले हराएको थियो । फाइनल आगमी आइतबार केप टाउनमा हुनेछ ।