दुबई (हाम्रो खेलकुद) – नेपालका दुई स्पिनर मिलन बोहरा र दीपेश कँडेलले आइसिसी यू१९ विश्वकप एसिया कप छनोटमा मलेसियाविरुद्ध घातक बलिङ प्रदर्शन गरेका छन् । मलेक क्रिकेट ग्राउन्डमा २ मा टस जितेर पहिला ब्याटिङ थालेको मलेसियाले २६ ओभरमा ६ विकेट गुमाउँदै ५४ रन बनाएको छ ।

तीव्र गतिका बलर आकाश चन्दले दोस्रो ओभरको तेस्रो बलमा ओपनर तथा कप्तान सिद्धार्थ कार्तिकलाई १ रनमा बोल्ड आउट गर्दै नेपाललाई पहिलो सफलता दिलाएका थिए । स्पिनर मिलन बोहराको बलमा एज लागेर अर्का ओपनर मोहम्मद हर्सन १२ रनमा बोल्ड आउट भएका थिए । उनले २४ बल खेल्दै २ चौका प्रहार गरे ।

मोहम्मद अकरम मलेल ५१ बलमा ३ चौकासहित २६ रनमा क्याच आउट भए । उनी स्पिनर दीपेश कँडेलको बलमा ठूलो सट खेल्ने धुनमा लङअनमा विशाल विक्रम केसीबाट क्याच आउट भएका थिए । मोहम्मद आलिफ शमासुल बहरिन २८ बल खेल्दै ४ रनमा दीपेश कँडेलबाट कट एड बोल्ड आउट भए ।

दीपेशले नै सिद्धार्थ निलकण्ठनलाई ३ रनमा स्टम्पिङ आउट गराए । मिलनले शिवनाराण राहुललाई १ रनमा एलबीडब्लू आउट गरे । नेपालका बायाँ हाते स्पिनर दीपेश कँडेलले ६ ओभरमा २ मेडनसहित ६ रन खर्चेर २ विकेट लिएका छन् । उनले गरेका ३६ बल मध्य ३१ डट राखेका छन् । मिलन बोहराले ८ ओभरमा ४ मेडनसहित ८ रन खर्चेर २ विकेट लिएका छन् । मिलनले ४८ मध्य ४२ बल डट राखेका छन् ।

नेपालले आज विकेटकिपर दीपक डुम्रेको स्थानमा स्पिन अलराउन्डर मिलन बोहरालई मौका दिएको छ । नेपालले पहिलो खेलमा सिंगापुरलाई ९६, दोस्रो खेलमा कुवेतलाई २ सय ४३ र तेस्रो खेलमा हङकङलाई ९ विकेटले हराएको थियो ।