दुबई (हाम्रो खेलकुद) – नेपाली यू–१९ क्रिकेट टोलीका कप्तान देव खनालले टोलीको सफलता श्रेय प्रशिक्षक जगत टमाटालाई जाने बताएका छन् । आइसिसी यू१९ विश्वकप एसिया क्षेत्र छनोटमा नेपालले लगातार चार जित निकाल्दै विश्वकप खेल्नबाट एक कदम टाढा रहेपछि देवले हाम्रो खेलकुदसँग कुरा गर्दै उक्त प्रतिक्रिया दिएका हुन् ।

‘टिमको वातावरण एकदमै राम्रो छ । अहिलेसम्म सजिलै जित भएको छ । अन्तिम खेल बाँकी छ । विश्वकप अव एक कदम टाढा छ भन्न मिल्छ । समग्रमा टिमले धेरै राम्रो प्रदर्शन र एकदमै राम्रो क्रिकेट खेलि राखेको छ । ४०-४५ दिन जुन तयारी गरेका थियौं । त्यसको मिहिनेत पाई राखेको छौं’, मलेसियालाई १० विकेटले हराएपछि देवले भने ।

देवले नेपालबाट १० ओडिआई खेल खेलेका छन् । टोलीका सर्वाधिक अनुभवी खेलाडी हुन् । उनले गतवर्ष पनि नेपाली यू१९ टोलीको कप्तानी गरेका थिए । देव एकदमै युवा टोली भएको बताउँछन् । ‘अहिलेको टोली एकदमै युवा छ । पहिला अर्जुन साउद, बसिर थियो । जस्तो हामीले क्रिकेट खेलेका छौं त्यो एकदमै राम्रो देखिएको छ । युवा खेलाडीले देश र टोलीको लागि जिम्मेवारी लिएका छन् । त्यो एकदमै ठूलो कुरा हो’, उनले भने ।

नेपालले सिंगापुरलाई ९६, कुवेतलाई २ सय ४३, हङकङलाई ९ विकेट र मलेसियालाई १० विकेटले हराएको थियो । नेपालले चारै खेलमा जित सहज रुपमा हात पारेको छ । देव नेपालले राम्रो क्रिकेट खेलेको बताउँछन् ।

‘विपक्षी टोली अलिकति कमजोर होलान् । यो उमेर समूहमा सबै बराबर नै हुन्छ । अलिकित हामीले राम्रो क्रिकेट खेलेको हो भन्न मिल्छ । दुई महिना हामीले जुन मिहिनेत गरेका थियौं त्यसको नतिजा पाई राखेका छौं’, देवले भने ।

यसअघि नेपालले ब्याटिङमा संघर्ष गर्दै आएको थियो । तर यस पटक खुलेर ब्याटिङ गरेको छ । नेपालले कुवेतविरुद्धै एकै खेलमा दुई शतक हानेको थियो । अर्जुन कुमालले १ सय ८ र देव खनालले १ सय २५ रनको शतकीय इनिङ खेलेका थिए । कुनैपनि नेपालको खेलमा पहिलो पटक दुई शतक प्रहार भएको थियो ।

‘भनम न अव त्यो संस्कार (कल्चर) फेरिदैछ । सिनियर टिम दाइहरुले जिम्मेवारी लिई राखेका छौं । हामीले पनि त्यहिँ पछ्याउन प्रयास गरेका छौं । नेपालमा हामीले सिनियर टोलीसँग चार खेल खेलेका थियौं । हामीले त्यहाँ पनि त्यहिँ छलफल गरेका थियौं । अव यू-१९ पालो हो विश्वकप गएर खेल्नी । त्यो जिम्मेवारी लिने हाम्रो पालो हो । त्यहिँ पूरा गर्ने प्रयास गरेका छौं’, उनले भने ।

नेपाली यू-१९ टोलीको मुख्य प्रशिक्षकमा जगत टमाटा छन् । टमाटाको प्रशिक्षकमा नेपालले २०१२ र २०१६ मा यू१९ विश्वकप खेलेको थियो । २०१८ मा सिनियर टोलीले ओडिआई मान्यता प्राप्त गरेको थियो । यस पटक टोलीको नतिजा राम्रो आउनुमा त्यसको श्रेय टमाटालाई नै जाने उनले भने ।

‘भनम न जगत गुरु आफैंमा एउटा लक्की चाम जस्तो हुनुन्छ । यो उमेरमा आएर वहाँको जुन शक्ति छ त्यो उत्कृष्ट छ । यो उमेरमा आएर वहासँग कसैले प्रतिस्पर्धा गर्न सक्दैन जस्तो मलाई लाग्छ । वहाँले जसरी हामीलाई साथ दिनुहुन्छ । सबै कुरा मिलाएर राख्नु भएको छ । पहिलो दिन देखि अहिले सम्म सबै कुरा ठाउँमा छ । यो नतिजा आउनुमा सबैभन्दा ठूलो प्रयास वहाँको नै हो । यो नतिजा पाएको हामीले सबै श्रेय जगत गुरुलाई जान्छ’, देवले भने ।

नेपाल र युएईले सुरुवाती चार खेलमा लगातार जित हात पारेपछि अन्तिम खेलको विजेता टोली २०२४ मा श्रीलंकामा हुने यू१९ विश्वकप खेल्ने पक्का भएको हो । युएई ४ खेलमा ८ अंकका साथ ४.२६८ नेटरनरेट सहित शीर्ष स्थानमा छ। नेपाल ४ खेलमा ८ अंकका साथ दोस्रो स्थानमा छ । नेपालको नेटरनरेट ३.८२९ छ ।

नेपाल र युएईबीचको खेल बिहीबार आजमानका रहेको इडेन गार्डेनमा हुनेछ । उक्त खेलको विजेता टोली प्रतियोगिता च्याम्पियन बन्नेछ । प्रतियोगिता च्याम्पियन टोलीले २०२४ मा हुने यू-१९ विश्वकप खेल्न पाउनेछ । नेपाल आठौं पटक यु-१९ विश्वकप खेलने सोचका साथ मैदान प्रवेश गर्नेछन् ।

भिडियो हेर्नुहोस् : https://www.youtube.com/watch?v=GqNFwY1wBvs