दुबई (हाम्रो खेलकुद) – नेपाली क्रिकेट टोलीका स्पिनर सन्दीप लामिछानेले नेपालको पहिलो लक्ष्य अव ओडिआई मान्यतालाई कायम राख्ने बताएका छन् । आइसिसी विश्वकप लिग-२ त्रिकोणात्मक ओडिआई सिरिजमा घरेलु टोली युएईलाई ४२ रनले हराएपछि सन्दीपले उक्त प्रतिक्रिया दिएका हुन् ।
‘अन्तिम समयमा सामान्य थियो । यो जित हाम्रो लागि एकदमै महत्वपूर्ण छ । वहाँ तीन खेल जितेपछि नेपालमा हामीले एक वाई एक खेलको रुपमा लिएका छौं । सोमपाल र दीपेन्द्रले दाईले साच्चै उत्कृष्ट बलिङ गर्नुभयो । हामीलाई बीचमा विकेटको जुन मोमेन्ट चाहिँएको थियो त्यो पायौं र खेलमा फिर्ता हुन पायौं’, युएईविरुद्ध जितपछि सन्दीपले भने ।
त्यसैमा थपे, ‘यो उत्कृष्ट टिम प्रदर्शन थियो । सबैको तर्फबाट योगदान थियो । सबैले ब्याटिङ होस्, बलिङ होस् वा फिल्डिङ ।’
सन्दीप नेपाली र विश्व क्रिकेटमा लेग स्पिनरको रुपमा चिनिन्छन् । तर यस सिरिजमा सन्दीपले तल्लोक्रममा राम्रो ब्याटिङ गरे । त्यसैले नेपालले आज उनलाई सातौं नम्बरमा पठाएको थियो । सन्दीपले भीम सार्कीसँग महत्वपूर्ण साझेदारी गरे । सन्दीप ब्याटिङमा जादा नेपाल १७.१ ओभरमा ६८–५ को अवस्थामा थियो ।
एक समय ६८–५ को दयनीय अवस्थामा पुगेको नेपाललाई भीम र सन्दीपले ५६ रनको साझेदारी गरेका थिए । सन्दीप युएईसँग ४० बलमा १ चौकासहित २७ रनमा आउट भए । सन्दीपले पपुवा न्युगिनीलाई पाँच विकेटले हराउँन आसिफ शेखसँग आठौं विकेटका लागि ७७ रनको अविजित साझेदारी गरेका थिए ।
एक समय १०५–७ को अवस्थामा सन्दीपले आसिफसँग मिलेर जित पक्का गराएका थिए । सन्दीपले उक्त खेलमा ५० बलमा ३ चौकासहित ३५ रनमा अविजित रहेका थिए । सन्दीपले विजयी चौका प्रहार गरेका थिए ।
‘सामान्य सोच थियो । मेरो टिमले मलाई विश्वास गरेको थियो । खेलको अवस्था अनुसार ब्याटिङ गरे । मेरो छिटो छिटो रन हान्ने जुन क्षमता छ त्यसलाई टाढा राखेर सबै कुरालाई मनमा राखेर । भीमले आज जुन तरिकाले ब्याटिङ गरि रहेको थियो । मेरो एकदमै काम भएको सजिलै उसलाई सिंगल रन दिने र भीमले जुन तरिकाले बाउन्ड्रीहरु बीचबीचमा निकालेको थियो । यसको सबै श्रेय भीम सार्कीलाई जान्छ’, जितपछि सन्दीपले भने ।
‘मलाई लाग्छ स्टोरी दुवै एन्डबाट राम्रो भएको थियो । अस्तिपनि टिममले ब्याटिङमा माथि बढुवा गरेको थियो । त्यहिँ एउटा भूमिका दिएको थियो की एक एन्डबाट इनिङ होल्ड गर्ने थियो । अस्ति आसिफलाई सकेसम्म स्ट्राइकमा ल्याउने भूमिका थियो । म पक्कैपनि धेरै भन्दा धेरै ब्याटिङ गर्न रुचाउँछु । पछि कुनैपनि अवस्थामा टिमलाई म चाहिँएको अवस्थामा आफ्नोतर्फबाट शतप्रतिशत दिन सकु’, ब्याटिङ बारे सन्दीपले भने ।
नेपालले घरेलु मैदानमा स्कटल्यान्ड र नामिबियालाई चारमा चार जितेको थियो । युएईमा चारमा तीन खेल जित्यो । नेपाल उच्च लयमा छ । अन्तिम चार खेल नेपालको लागि निकै महत्वपूर्ण छ । नेपाल सिधैं शीर्ष तीनमा रहेर विश्वकप छनोट खेल्न सबै खेल जित्नुपर्ने हुन्छ । ओडिआई मान्यता जोगाउन चार मध्य दुई खेल जित्नुपर्ने हुन्छ ।
सन्दीप चार भन्दा पनि हरेक खेललाई एक एक गरि हेर्ने बताउँछन् । ‘मलाई लाग्छ चार खेल भन्दा पनि सबै एक खेल वाई एक हेर्न चाहन्छौं । त्यो चारै खेल हाम्रो लागि निकै महत्वपूर्ण पनिछ । पहिला हाम्रो सुरुको दुई खेलको लागि नै लक्ष्य हुनेछ । पहिला हाम्रो लक्ष्य ओडिआई स्टाटस कायम राख्न हुनेछ । त्यसपछि बाँकी दुई खेलको लागि हामीले योजना बनाउने छौं’, उनले भने ।
सन्दीपले बलिङमा उत्कृष्ट प्रदर्शन गर्दै आएका छन् । घरेलु मैदानमा सन्दीपले ४ खेलमा १३ विकेट लिएका थिए । यस सिरिजमा सन्दीपले तीन खेलमा पाँच विकेट लिए । सन्दीप टिम प्रदर्शन बताउँछन् ।
‘यो पनि टिम प्रदर्शन हो । अर्को एन्डबाट डिफेन्सिभ भएपछि अर्को एण्डबाट आक्रामण गर्न पनि सजिलो हुन्छ । नेपालमा पनि त्यहिँ भएको थियो । अर्को एण्डबाट अरु बलरले डिफेन्सिभ भूमिका खेलेको हुँदा मैले अट्याक गरेर विकेट निकाल्न सजिलो भएको थियो । यसको श्रेय सबै खेलाडीलाई जान्छ’, सन्दीपले भने ।
मोन्टी देशाई नेपाल आएपछि नेपाली टोली फेरिएको छ । सबै खेलाडीले मोन्टीको आगमनले टोलीमा सकरात्मक प्रभाव परेको बताउँछन् । नेपालले मोन्टीको आगमनपछि लिग२ मा ८ मध्य ७ खेलमा जित हात पारेको छ ।
‘ वहाँ सधै सकरात्मक हुनुन्छ । हामीले यू१९ मा पनि वहाँसँग काम गर्ने मौका पाएका थियौं । सबैको विश्वासलाई पनि बढाएको छ । हामीले यो आठ खेल जुन तरिकाले खेलेका छौं त्यो पक्कैपनि हामीले टोलीको क्यारेक्टरमा खेलेका छौं । मलाई लाग्छ हाम्रो भविष्य राम्रो हुनेछ।’
नेपालले अव बिहीबार टियु मैदानमा पपुवा न्युगिनीसँग खेल्नेछ । मार्च १२ मा युएई, मार्च १३ मा पपुवा न्युगिनी र मार्च १६ मा युएईसँग खेल्नेछ ।
सन्दीपको पूरा भिडियो हेर्नुहोस् :
