काठमाडौं (हाम्रो खेलकुद) – ह्योल्मो-११ ले पाँचौ संस्करणको पाँचपोखरी टि२० क्रिकेट प्रतियोगिताको उपाधि जितेको छ । शुक्रबार मुलपानी क्रिकेट मैदानमा भएको फाइनल खेलमा ह्योल्मोले पाँच पोखरी क्रिकेट क्लबमाथि दुई रनको रोमाञ्चक जित निकाल्दै उपाधि जितको हो ।
पहिले ब्याटिङ गरेको ह्योल्मोले निर्धारित ओभरमा ६ विकेट गुमाएर १७८ रन बनाएको थियो । उच्च लयलाई निरन्तरता दिँदै विवेक तामाङले ५० बलमा ८ चौका र ४ छक्कासहित ८३ रनको उत्कृष्ट इनिङ खेले ।
विनोद तामाङ ३४ बलमा ५ चौका र १ छक्कासहित ४३ रन जोडे । पाँच पोखरीका अनुभवी स्पिनर विजयकुमार धितालले ४ ओभरमा १७ रन खर्चेर २ विकेट लिए ।मनोज खड्काले दुई र सुशन चौलागाईंले एक विकेट लिए ।
जितको लागि १ सय ७९ रनको विजयी लक्ष्य पछ्याएको पाँचपोखरीले २० ओभरमा ४ विकेट गुमाउँदै १ सय ७६ रन बनाउन सक्यो । युवा ब्याटर सार्थक धितालले ६१ बलमा ९ चौका र १ छक्कासहित ७८ रनको योगदान दिएपनि उपाधि जिताउन सकेनन् । पहिलो विकेटका लागि सार्थक र एकनाथ नेपालले १०.४ ओभरमा ९५ रनको साझेदारी गर्दै विष्फोटक सुरुवात गराएका थिए ।
एकनाथलाई ३५ रनमा बिनोद तामाङले कट एण्ड बोल्ड गरेपछि लगातार विकेट गुमाएपछि झिनो अन्तरले हार्न पुगेको हो । रोशन श्रेष्ठ, विक्की श्रेष्ठ र विजय धितालले १०-१० रन बनाए ।
पाँच पोखरीलाई जितको लागि ९ बलमा २० रन चाहिँएको अवस्थामा उत्कृष्ट ब्याटिङ गरेका सार्थक दावा सोनमको बलमा ठूलो सट खेल्ने धुनमा डिपमिड विकेटमा विवेक तामाङबाट क्याच आउट भएपछि जितको सम्भावना कठिन बनेको थियो ।
युवा अलराउन्डर सार्थक गतवर्ष सर्वोत्कृष्ट खेलाडी चुनिएका थिए । गतवर्ष पाँचपोखरी भोताङ क्रिकेट टिमसँग ६८ रनले पराजित भएको थियो । यू-१९ राष्ट्रिय प्रतियोगिता बागमतीबाट प्रतिनिधित्व गरि सकेका सार्थकले लगातार अलराउन्ड प्रदर्शन गर्दै आएका छन् ।
महेश ध्वज देउजा १६ले रन बनाए । ह्योल्मोका विनोद तामाङ, नामगिल चेतन, छुङ्गु लामा र दावा सोनामले १-१ विकेट लिए ।पाँचपोखरीबाट बाबुछोरा विजय र सार्थकसँगै खेलेका थिए । ह्योल्मोका विवेक तामाङ प्रतियोगिताको प्लेयर अफ द सिरिज चुनिए ।
उनले प्रतियोगिताभर तीन पटक प्लेअर अफ दि म्याच बन्दा १७८ रन बनाएका थिए । पाँचपोखरी क्रिकेट क्लबका सार्थक धिताल उत्कृष्ट ब्याटर चुनिए । ८ विकेट लिएका करण तामाङ उत्कृष्ट बलर चुनिए ।
च्याम्पिय ह्योल्मो ११ ले उपाधिसँगै नगद ८० हजार पायो । उपविजेता पाँचपोखरी क्रिकेट क्लबले ५० हजार प्राप्त गर्यो । पाँचपोखरा थाङ्गपाल गाउँपालिकाका अध्यक्ष टासी लामाले विजेता टिम तथा खेलाडीलाई पुरस्कार वितरण गरे ।
पाँचपोखरी थाङ्पाल गाउँपालिका खेलकुद विकास समितिको आयोजना तथा पाँचपोखरी क्रिकेट क्लबको व्यवस्थापनमा शनिबारबाट सुरु भएको प्रतियोगितामा सिन्धुपाल्चोक जिल्लाका ७ टिमको सहभागिता थियो । प्रतियोगिताको मुख्य प्रायोजक माउन्ट शेर्पा ट्राभल एंड टुरिजम रहेको थियो।
साथै ग्रेट हिमालयन क्रिकेट एकेडेमी (जीएचसीए) ले यस प्रतियोगितामा सफलता हासिल गर्ने सर्वोत्कृष्ट खेलाडीलाई एकवर्ष र उत्कृष्ट बलर एवं उत्कृष्ट ब्याटरलाई ६ महिना निःशुल्क क्रिकेट प्रशिक्षण प्रदान गर्नेछ ।
