एजेन्सी – घरेलु टोली बंगलादेशले पहिलो ओडिआई खेलमा आयरल्यान्डमाथि १ सय ८३ रनको विशाल जित हात पारेको छ । योसँगै तीन ओडिआई खेलको सिरिजमा बंगलादेशले १–० को अग्रता लिएको छ।

जितको लागि ३ सय ३९ रनको विशाल विजयी लक्ष्य पछ्याएको आयरल्यान्ड ३०.५ ओभरमा १ सय ५५ रनमा अल आउट भयो । आयरल्यान्डका जर्ज डोकरेलले ४७ बलमा ६ चौकासहित सर्वाधिक ४५ रन बनाए । ओपनर स्टेफन डोहेनी ३४, पल स्टर्लिङ २२, कर्टिस क्याम्फर १६, ह्यारी टेक्टर ३ र मार्क आदिरले १३ रन बनाए ।

बंगलादेशका इबादोत हसनले ६.५ ओभरमा ४२ रन खर्चेर ४ विकेट लिए । नासुम अहमदले ३, तस्किन अहमदले २ र सकिब अल हसनले एक विकेट लिए ।

त्यसअघि टस हारेर पहिला ब्याटिङको निम्तो पाएको बंगलादेशले निर्धारित ५० ओभरमा ८ विकेट गुमाउँदै ३ सय ३८ रन बनायो । बंगलादेशका तौहिद हृदोयले ८५ बलमा ८ चौका र २ छक्कासहित सर्वाधिक ९२ रन बनाए ।

सकिब अल हसनले ८ बलमा ९ चौकासहित ९३ रन बनाए । सकिब र तौहिदले चौथो विकेटका लागि १ सय ३५ रनको सानदार शतकीय साझेदारी गरेका थिए । अनुभवी विकेटकिपर मुश्फिकुर रहिमले २६ बलमा ३ चौका र ३ छक्कासहित ४४ रन जोडे । लिटन दास २६, नाज्मुल हसन सान्टो २५ र यासिर अलीले १७ रन बनाए ।

आयरल्यान्डका ग्राहम हुमेले १० ओभरमा ६० रन खर्चेर ४ विकेट लिए । दोस्रो खेल सोमबार हुनेछ ।