एजेन्सी – नेपाली क्रिकेट टोलीका पूर्वकप्तान पारस खड्का सम्मिलित एसिया लायन्सले लेजेन्ड्स क्रिकेट मास्टर्स एलिमिनेटर खेलमा इन्डिया महाराजसलाई १ सय ९२ रनको लक्ष्य दिएको छ ।
दोहामा टस जितेर पहिला ब्याटिङ रोजेको एसियाले निर्धारित २० ओभरमा ५ विकेट गुमाउँदै १ सय ९१ रन बनायो । एसियाका ओपनर उपुल थरंगाले ३१ बलमा ७ चौका र १ छक्कासहित सर्वाधिक ५० रनको योगदान दिए । तिलकरत्ने दिलशान २६ बलमा २ चौकासहित २७ रनमा आउट भए ।
पहिलो विकेटका लागि थरंगा र दिलशानले ८.५ ओभरमा ८३ रनको साझेदारी गरेका थिए । मोहम्मद हफिज २४ बलमा २ चौका र ३ छक्कासहित ३८ रनमा आउट भए । थिसेरा परेरा १२ बलमा ३ छक्कासहित २४ रनमा आउट भए । अस्गर अफगान २४ बलमा १ चौका र २ छक्कासहित ३४ रनमा अविजित रहे ।
नेपालका पारस खड्काको भने ब्याटिङ अवसर आएन । शीर्ष र मध्यक्रमका ब्याटरले राम्रो ब्याटिङ गरेपछि पारस र मिस्बाह उल हकले ब्याटिङ गर्नु परेन । अब्दुल रजाक २ र शाहिद अफ्रिदीले १ रन बनाए ।
भारतका स्टुअर्ट बिन्नीले ३ ओभरमा ३८ रन खर्चेर २ विकेट लिए । प्रज्ञान ओझाले २ ओभरमा २६ रन खर्चेर २ विकेट लिए । प्रबिन ताम्बेले एक विकेट लिए । यस खेलको विजेताले फाइनलमा वल्ड जायन्ट्ससँग खेल्नेछ ।
