एजेन्सी – नेपाली क्रिकेट टोलीका पूर्वकप्तान पारस खड्का सम्मिलित एसिया लायन्सले लेजेन्ड्स क्रिकेट मास्टर्स एलिमिनेटर खेलमा इन्डिया महाराजसमाथि ८५ रनको सानदार जित हात पार्दै फाइनलमा पुगेको छ । एसियाले उपाधिको लागि सोमबार वल्ड जायन्ट्ससँग खेल्नेछ ।
जितको लागि १ सय ९२ रनको विशाल लक्ष्य पछ्याएको भारत १६.४ ओभरमा १ सय ६ रनमा अल आउट भयो । कप्तान गौतम गम्भीरले १७ बलमा ७ चौकासहित सर्वाधिक ३२ रन बनाए । रोविन उथपा १५, मोहम्मद कैफ १४, सुरेश रैना १८, युसुफ पठान ९ र इफरान पठान ३ रनमा आउट भए ।
एसियाका सोहेल तनविर, अब्दुर रजाक र मोहम्मद हफिजले दुई दुई विकेट लिए । इसुरु उडाना, शाहिद अफ्रिदी र तिलकरत्ने दिलशानले एक एक विकेट लिए ।
त्यसअघि दोहामा टस जितेर पहिला ब्याटिङ रोजेको एसियाले निर्धारित २० ओभरमा ५ विकेट गुमाउँदै १ सय ९१ रन बनाएको थियो । एसियाको जितमा ओपनर उपुल थरंगाले ३१ बलमा ७ चौका र १ छक्कासहित सर्वाधिक ५० रनको योगदान दिए । थरंगा नै खेलको प्लेयर अफ द म्याच चुनिए । अर्का ओपनर तिलकरत्ने दिलशान २६ बलमा २ चौकासहित २७ रनमा आउट भएका थिए ।
मोहम्मद हफिज २४ बलमा २ चौका र ३ छक्कासहित ३८ रनमा आउट भए । थिसेरा परेरा १२ बलमा ३ छक्कासहित २४ रनमा आउट भए । अस्गर अफगान २४ बलमा १ चौका र २ छक्कासहित ३४ रनमा अविजित रहे ।
नेपालका पारस खड्काको भने ब्याटिङ र बलिङ दुवैको अवसर पाएनन् । भारतका स्टुअर्ट बिन्नीले ३ ओभरमा ३८ रन खर्चेर २ विकेट लिए । प्रज्ञान ओझाले २ ओभरमा २६ रन खर्चेर २ विकेट लिए । प्रबिन ताम्बेले एक विकेट लिए ।
