एजेन्सी – कप्तान टेम्बा बभुमाको सानदार शतकका बाबजुद घरेलु टोली दक्षिण अफ्रिका दोस्रो ओडिआई खेलमा वेस्टइन्डिजसँग ४८ रनले पराजित भएको छ । योसँगै तीन खेलको ओडिआई सिरिजमा वेस्टइन्डिजले १-० को अग्रता लिएको छ ।

जितको लागि ३ सय ३६ रनको विशाल विजयी लक्ष्य पछ्याएको दक्षिण अफ्रिका ४१.४ ओभरमा २ सय ८७ रनमा अल आउट भयो । दक्षिण अफ्रिकाका कप्तान टेम्बा बभुमाले १ सय १८ बलमा ११ चौका र ७ छक्कासहित १ सय ४४ रनको सानदार शतकीय इनिङ खेलेपनि टोलीको हार टार्न सकेनन् ।

अर्का ओपनर क्विन्टन डि कक २६ बलमा ५ चौका र ३ छक्कासहित ४८ रनमा आउट भए । अन्य कुनैपनि ब्याटरले राम्रो प्रदर्शन गर्न सकेनन् । वेस्टइन्डिजका अल्जारी जोशेफले ८.४ ओभरमा ५३ रन खर्चेर सर्वाधिक तीन विकेट लिए । अकिल हुसैनले १० ओभरमा ५९ रन खर्चेर ३ विकेट लिए ।

त्यसअघि बुफ्लो पार्क इस्ट लन्डनमा टस जितेर पहिला ब्याटिङ रोजेको वेस्टइन्डिजले निर्धारित ५० ओभरमा ५ विकेट गुमाउँदै ३ सय ३५ रन बनाएको थियो । वेस्टइन्डिजको जितमा कप्तान शाई होपले १ सय १५ बलमा ५ चौका र ७ छक्कासहित १ सय २८ रनको सानदार शतकीय अविजित इनिङ खेले । होपको यो ओडिआई करिअरको १४ औं शतक थियो ।

ओपनर ब्रेन्डन किंग २९ बलमा ४ चौकासहित ३० र काइल मेयर्स २६ बलमा ५ चौका र २ छक्कासहित ३६ रनमा आउट भए । निकोलस पुरन ४१ बलमा ५ चौकासहित ३९ र रोभम्यान पावेल ४९ बलमा २ चौका र ३ छक्कासहित ४६ रनमा आउट भए । अन्य ब्याटरले भने राम्रो प्रदर्शन गर्न सकेनन् ।

घरेलु टोली दक्षिण अफ्रिकाका जेराल्ड कोएट्जीले १० ओभरमा ५७ रन खर्चेर ३ विकेट लिए । ब्यूजोर्न फोटुइनले १० ओभरमा ५७ रन खर्चेर २ विकेट लिए । तबरेज शाम्सीले १० ओभरमा ६२ रन खर्चेर २ विकेट लिए । पहिलो खेल वर्षाको कारण रद्द भएको थियो । तेस्रो खेल मंगलबार हुनेछ ।