एजेन्सी – ओपनर सोफी डेविनको विष्फोटक ब्याटिङमा रोयल च्यालेन्जर्स बेंगलोरले वुमन्स प्रिमियर लिगमा गुजरात जायन्ट्समाथि ८ विकेटको सानदार जित हात पारेको छ । जितको लागि १ सय ८९ रनको विशाल विजयी लक्ष्य पछ्याएको बेंगलोरले १५.३ ओभरमा २ विकेट गुमाउँदै पूरा गर्यो ।

बेंगलोरको जितमा ओपनर सोफी डेविनले ३६ बलमा ९ चौका र ८ छक्कासहित ९९ रनको विष्फोटक शतकीय इनिङ खेलिन् । सोफी किम गर्थको १२ औं ओभरको पाँचौं बलमा क्याच आउट भएपछि शतक बनाउन एक रनले चुकेकी थिइन् । कप्तान स्मृति मन्धनाले ३१ बलमा ५ चौका र १ छक्कासहित ३७ रनमा आउट भइन् ।

पहिलो विकेटका लागि सोफी र स्मृतिले ९.२ ओभरमा १ सय २५ रनको सानदार शतकीय साझेदारी गरेका थिए । एलिसा पेरी १८ र हेथर नाइट २२ रनमा अविजित रहिन् ।

त्यसअघि ब्रेबोन स्टेडियम मुम्बईमा टस जितेर पहिला ब्याटिङ रोजेको गुजरातले निर्धारित २० ओभरमा ८ विकेट गुमाउँदै १ सय ८८ रन बनाएको थियो । गुजरातकी लौरा वोल्भार्डटले ४२ बलमा ९ चौका र २ छक्कासहित सर्वाधिक ६८ रन बनाइन् ।

एलिसा गार्डनरले २६ बलमा ६ चौका र १ छक्कासहित ४१ रन बनाइन् । बेंगलोरकी श्रीखला पाटिलले दुई विकेट लिइन् । बेंगलोर ७ खेलमा २ मा जित र ५ मा हारसहित ४ अंकका साथ चौथो स्थानमा छ ।

गुजरात ७ खेलमा २ मा जित र ५ मा हारसहित पुछारमा छ । मुम्बई ६ खेलमा ५ मा जित र १ मा हारसहित १० अंकका साथ शीर्ष स्थानमा छ । दिल्ली ६ खेलमा ४ मा जित र २ मा हारसहित ८ अंकका साथ दोस्रो स्थानमा छ ।