काठमाडौं (हाम्रो खेलकुद) – नेपालले आइसिसी विश्वकप लिग-२ त्रिकोणात्मक ओडिआई सिरिजको अन्तिम १२ खेलमा अविश्वसनीय प्रदर्शन गर्यो । १२ मध्य ११ खेलमा जित हात पार्दै नेपालले आगमी चार वर्षको लागि ओडिआई मान्यता मात्रै जोगाएन । सिधै आगमी जुन जुलाईमा जिम्बावेमा हुने विश्वकप छनोटमा स्थान बनायो ।

अन्तिम १२ खेल खेल्नुअघि नेपालको लागि दुवै सफलता असम्भव जस्तै देखिएका थिए । पछिल्लो तीन सिरिजमा नेपालले जितेका सबै खेलमा सानदार ब्याटिङ गर्यो । नेपालको सबैभन्दा कमजोर मानिने ब्याटिङ नै विपक्षी टोलीसामु सबैभन्दा ठूलो हतियार बन्यो ।

नेपालले च्याम्पियन स्कटल्यान्डलाई दुवै खेलमा हराउँदै सनसनी मच्यायो । नामिबिया र स्कटल्यान्डमाथि सानदार जितपछि नेपालको मनोबल झनै बढ्यो । यसअघि २ सय रनको लक्ष्य पूरा गर्न संघर्ष गर्ने नेपालले पछिल्ला १२ खेलमा २ सय ५० माथिको योगफल सहजै पूरा गरेको थियो । नेपालको प्रदर्शन फेरिएको छ । टोलीको मैदानभित्रको प्रदर्शन र मैदानबाहिरको माहोलमा रुपान्तरण नै भएको छ ।

नेपालले सानदार प्रदर्शन गर्नुमा मुख्य प्रशिक्षक मोन्टि देशाईको आगमनदेखि थुप्रै कारणहरु छन् । नेपालले सोझै विश्वकप छनोटमा स्थान बनाउनुको मुख्य पाँच कारण यस प्रकार छन् ।

५.फेरिएको आत्माविश्वास र मनोबल

नेपाली क्रिकेटमा प्रतिभाको कहिल्यै कमी थिएन । तर कमजोर मनोबलको कारण थुप्रै जित्नसक्ने खेलहरु हार्न पुगेको थियो । तर देशाई मुख्य प्रशिक्षक र कप्तान रोहितको साझेदारी जमेपछि नेपाली खेलाडीको मनोबल फेरिएको छ । ब्याटिङमा ठूलो लक्ष्य पूरा गर्न सकिन्छ भन्ने सबै खेलाडीको मनोबल भयो ।

पहिलो खेलमा नामिबियाले प्रस्तुत गरेको २ सय ८६ रनको विशाल लक्ष्य पूरा गर्यो । त्यो लक्ष्य पूरा गरेपछि टोलीको आत्माविश्वास झनै बढ्यो । नामिबिया र स्कटल्यान्ड जस्ता बलिया टोलीविरुद्ध लगातार तीन पटक २ सय ७० रनको योगफल पूरा गरेपछि पुरै मोमेन्टम नेपालको पक्षमा आयो ।

नेपालले कुनैपनि खेलमा हार मानेन । त्यो चाहे २ सय ८६ लक्ष्य पछ्याउँदा होस् वा अन्तिम खेलमा ३ सय ११ रन लक्ष्य पछ्याउँदा नै । प्रशिक्षकले हरेक खेलाडीमा जित्न सकिन्छ भन्ने सोच विकास गर्न सफल भए । पपुवा न्युगिनीले दिएको १ सय ८० रनको लक्ष्य पछ्याउँदा १०५-७ को अवस्थामा पुग्दा पनि टोलीभित्र जितिन्छ भन्ने विश्वास थियो । वा स्कटल्यान्डले दिएको २ सय १३ रनको लक्ष्य पछ्याउँदा १०३-६ को अवस्थामा पुग्दा कप्तान रोहितले नै नेपाललाई उकासे ।

क्रिकेटमा मानसिक अवस्थाले धेरै फरक पार्छ । खेलाडीले उच्च मनोबल हुँदा जस्तोसुकै दबाबमा पनि प्रदर्शन गर्न सक्छन् । देशाईको आगमनसँगै खेलाडीको मनोबल उच्च रह्यो । फरक खेलमा फरक खेलाडीले प्रदर्शन गरे । जसले गर्दा टिममा एक-अर्का प्रति विश्वास बढ्यो । एक खेलाडीमा निर्भर नभएपछि बिना दबाब खुलेर खेल्न थाले । त्यसैले नेपालले जित हात पार्यो ।

४. रोहितको कप्तानी र टोली एकता

रोहितको कप्तानीमा आगमनसँगै टोली एकजुट देखिएको छ । क्रिकेटमा एकता विना जित हात पार्न मुश्किल पर्छ र देशाईले यो पक्षबारे टोलीलाई राम्रोसँग बुझाए । यसअघि अन्य प्रशिक्षकले कप्तान र अन्य खेलाडीसँग उचित समन्वय गर्न नसक्दा टोलीभित्र केहि चिसोपना थियो ।

प्रशिक्षक देशाई र रोहितको जोडीले टिमलाई एक बनाएर लगेपछि झनै सानदार प्रदर्शन गर्न सफल भयो । सबै खेलाडीले एक अर्कालाई शतप्रतिशत साथ दिन थाले ।

देशाई प्रशिक्षकमा आएपछि रोहितको कप्तानीमा परिपक्वता आएको पनि देखिन्छ । खेलको अवस्था अनुसार खेलाडी परिवर्तन गरे । केहि खेलमा करणलाई बेन्चमा राखेर गुलशनलाई खेलाउने जोखिम लिए । ज्ञानेन्द्रलाई बेन्चमा राखेर ललितनारायण राजवंशीलाई मौका दिए । त्यो निर्णय टोलीको लागि सहि सावित पनि भयो ।

रोहितले १२ मध्य ८ खेलमा टस जिते । टियुमा नामिबिया र स्कटल्यान्डविरुद्ध सबै खेलमा टस जितेर लक्ष्य पछ्याउँदा पनि सहज भयो । बिहानको कन्डिसनमा ब्याटिङ गर्न मुश्किल पर्दछ।

३. घरेलु मैदान, दर्शक र कन्डिसनको फाइदा

नेपालले घरेलु मैदान टियुमा खेलेका ८ खेलमा ८ मानै खेल जित्यो । नेपालले घरेलु मैदान, कन्डिसन र समर्थकको भरपूर्ण फाइदा उठायो । घरेलु मैदान र दर्शकलाई १२ औं खेलाडी मानिन्छ।

नेपालले टियुको पिचको राम्रो सदुपयोग गर्यो । सबै खेलाडी टियुमा खेलेर हुर्किएको हुँदा पनि धेरै सहज भयो । अर्कोतर्फ हजारौं समर्थकले नेपाली खेलाडीलाई निरन्तरता उर्जा र हौसला प्रदान गरे ।

विपक्षी टोली नेपाली दर्शक सामू दबाबमा रहे । जसको फाइदा नेपाललाई भयो । घरेलु मैदानमा प्रदर्शन गर्न सहज हुन्छ । नेपालले अहिले जुन प्रदर्शन गरेको छ त्यो आगमी दिनमा विदेशी भूमिमा नगर्न पनि सक्छ ।

२. खेलाडीले जिम्मेवारी लिनु

यसअघि नेपालले हार्नुको मुख्य कारण ब्याटिङमा खराब सट छनोट र गैर जिम्मेवारपन थियो । खेलाडीले जिम्मेवारी लिएर कठिन समयमा खेल्न सकेका थिएनन् । क्रिजमा धैर्यता देखाउन सकेका थिएनन् । तर पछिल्ला तीन सिरिजमा खेलाडीले जिम्मेवारी प्रदर्शन गरे ।

सबै खेलाडीले आफ्नो भूमिका अनुसार जिम्मेवारी लिएर प्रदर्शन गरे । त्यसैको कारण नेपालले जित हात पार्न सफल भयो ।
अन्तिम खेलमा रोहित पौडेलले स्कटल्यान्डविरुद्ध २ सय १३ रनको लक्ष्य पछ्उँदा ११४-७ को अवस्थाबाट जित दिलाएका थिए । उक्त खेलमा रोहितले ९५ रनको परिपक्क प्रदर्शन गरेका थिए ।

स्कटल्यान्डविरुद्ध २ सय ७५ रनको लक्ष्य पछ्याउनेक्रममा ३९–३ को अवस्थाबाट कुशल मल्ल ८१ र दीपेन्द्रसिंह ऐरीले ८५ रनको इनिङ खेल्दै जिताएका थिए । पपुवा न्युुगिनीविरुद्ध १ सय ८० रनको लक्ष्य पछ्याउनेक्रममा १०५-७ को अवस्थाबाट आसिफ शेखले ८६ रनको परिवक्क प्रदर्शन गरेका थिए ।

सन्दीप लामिछानेले ३५ रन जोडेका थिए । युएईविरुद्ध ६८-५ को अवस्थाबाट २ सय २९ रनमा पुर्याउन भीम सार्कीले खेलेको ७० रनको इनिङ । यी उदाहरण मात्रै हुन् । यसरी सबै खेलाडीले खेलमा जिम्मेवारी लिएर प्रदर्शन गरेका थिए ।

१. मोन्टि देशाई प्रभाव

नेपाली टोलीको रुपान्तरणको मुख्य श्रेय प्रशिक्षक मोन्टि देशाईलाई जान्छ । मोन्टिले सुरुवातमा पूर्व प्रशिक्षक मनोज प्रभाकरले बनाएको भ्रदगोल ब्याटिङक्रममा एकरुपता ल्याए । नेपालको मुख्य समस्या ब्याटिङ थियो र टोलीको समीकरण सुधार गर्न मोन्टिले एक अतिरिक्त ब्याटर खेलाए ।

बायाँ हाते कुशल मल्ललाई टोलीमा मौका दिए । उनले बायाँ हाते कुशललाई सरप्राइज रुपमा तेस्रो नम्बरमा पनि ब्याटिङ गराए । कुशलले स्कटल्यान्डविरुद्ध ८१ र नामिबियाविरुद्ध ६२ रनको महत्वपूर्ण योगदान दिएका थिए ।

त्यस्तै टोलीमा अवसर नपाएका भीम सार्कीलाई मोन्टिले मौका दिए । भीमले युएईविरुद्ध दुई महत्त्वपूर्ण अर्धशतक प्रहार गरे । मध्यक्रममा खेल्न नसकेका दीपेन्द्रसिंह ऐरीलाई फिनिसरमा खेलाए । बलिङमा जमेका दीपेन्द्र नयाँ भूमिकामा सफल भए ।

नेपालले दीपेन्द्र र कुशल मल्ललाई स्पिनरको रुपमा खेलाउँदा टोलीमा एक अतिरिक्त ब्याटिङ थपे । मोन्टिले खेलाडीको मनोबल र हौसला बढाउन ‘ह्याप्पी ड्रेसिङ रुम’ नारा नै चलाए । मोन्टिको आगमनले टोलीले सानदार ब्याटिङ प्रदर्शन गर्यो ।

अर्कोतर्फ मोन्टिले टोलीमा खेलाडीको मनोबल र आत्माविश्वास बढाए । जुन टोलीलाई सबैभन्दा बढी आवश्यक थियो । सकारात्मक सोच र खुसी वातावरण स्थापित गरे । यसले टोलीको एकता मजबुत बनाउन सहयोग गर्यो । हरेक खेलाडीलाई भूमिका अनुसार प्रदर्शन गर्न लगाए । त्यसैको कारण नेपालले राम्रो नतिजा हात पार्यो ।