एजेन्सी – तीव्र गतिका बलर मिचेल स्टार्कको सानदार बलिङपछि भारतले दोस्रो ओडिआई खेलमा लज्जास्पद ब्याटिङ गर्दै अष्ट्रेलियालाई १ सय १८ रनको सामान्य लक्ष्य दिएको छ ।

विशाखापट्नमा टस हारेर पहिला ब्याटिङको निम्तो पाएको भारत २६ ओभरमा १ सय १७ रनमा अल आउट भयो । भारतका विराट कोहलीले ३५ बलमा ४ चौकासहित सर्वाधिक ३१ रन बनाए । अक्षर पटेल २९ बलमा १ चौका र २ छक्कासहित २९ रनमा अविजित रहे ।

अन्य कुनैपनि भारतीय ब्याटरले राम्रो प्रदर्शन गन सकेनन् । भारतका ७ खेलाडीले दोहोरो अंकमा रन जोड्न सकेनन् तीव्र गतिका बलर मिचेल स्टार्कले सुरुवाती चार विकेट लिँदै भारतलाई दयनीय अवस्थामा पुर्याएका थिए ।

ओपनर शुभमन गिल तेस्रो बलमै प्वाइन्टमा मार्नस लाबुसेनबाट शून्यमा क्याच आउट भएका थिए । दोस्रो विकेटका लागि रोहित शर्मा र विराट कोहलीले ३१ रनको साझेदारी गरेका थिए । स्टार्कको पाँचौं ओभरको चौथो बलमा फस्ट स्लिपमा रोहित शर्मा स्टिभ स्मिथबाट क्याच आउट भए ।

रोहितले १५ बलमा २ चौका प्रहार गरे । लगत्तै अर्को बलमा सुर्यकुमार यादव एलबीडब्लू आउट हुँदै गोल्डेन डक पेभेलिएन फर्किए । स्टार्कले नै लोकेश राहुललाई ९ रनमा एलबीडब्लू आउट गर्दै ८.४ ओभरमा ४८-४ को अवस्थामा पुर्याएका थिए । त्यसपछि नाथन एलिस र शन एबोटले मध्यक्रम ध्वस्त पारे ।

तीव्र गतिका बलर शन एबोटको बलमा हार्दिक पान्ड्याको क्याच एक फस्ट स्लिपमा स्टिभ स्मिथबाट एक हातले उत्कृष्ट रुपमा लिएपछि भारत संकटमा पुगेको थियो । नाथन एलिसले १६ औं ओभरको दोस्रो बलमा विराट कोहलीलाई एलबीडब्लू आउट गर्दै महत्वपूर्ण सफलता दिलाए । एलिसकै बलमार रविन्द्र जडेजा १६ रनमा कट बिहाइन्ड हुँदै विकेटकिपर एलेक्स केरीबाट क्याच आउट भए ।

शन एबोटले कुलदीप यादवलाई ४ र मोहम्मद शामीलाई शून्यमा पेभेलिएन फर्काए । अष्ट्रेलियाका मिचेल स्टार्कले ८ ओभरमा १ मेडनसहित ५३ रन खर्चेर ५ विकेट लिए ।

शन एबोटले ६ ओभरमा २३ रन खर्चेर ३ विकेट लिए । नाथन एलिसले ५ ओभरमा १३ रन खर्चेर २ विकेट लिए । पहिलो खेलमा भारत विजयी भएको थियो । तीन खेलको सिरिजमा भारत १-० ले अघि छ ।