एजेन्सी – युपी वारियर्सले वुमन्स प्रिमियर लिग (डब्लूपिएल) मा गुजरात जायन्ट्समाथि ३ विकेटको जित हात पारेको छ । योसँगै प्लेअफमा पुग्ने तीन टोलीको टुङ्गो लाग्दा बेंगलोर र गुजरात लिग चरणबाटै बाहिरिने दुई टोली बनेका छन् ।

जितको लागि १ सय ७९ रनको बलियो विजयी लक्ष्य पछ्याएको युपीले १९.५ ओभरमा ७ विकेट गुमाउँदै पूरा गर्यो । युपीको जितमा ग्रेस ह्यारिसले ४१ बलमा ७ चौका र ४ छक्कासहित ७२ रनको सानदार इनिङ खेलिन् ।

त्यस्तै ताहलिया म्याकग्राथले ३८ बलमा ११ चौासहित ५७ रन जोडिन् । सोफी एक्लेस्टोनले १३ बलमा २ चौकासहित महत्वपूर्ण १९ रन जोडिन् । गुजरातकी किम ग्राथले ४ ओभरमा २९ रन खर्चेर २ विकेट लिइन् । मोनिका पटेल, एलिसा गार्डनर, अनुजा कँवर र स्नेहा रानाले एक एक विकेट लिइन् ।

त्यसअघि ब्रेबोन स्टेडियम मुम्बईमा टस जितेर पहिला ब्याटिङ रोजेको गुजरातले निर्धारित २० ओभरमा ६ विकेट गुमाउँदै १ सय ७८ रन बनाएको थियो । गुजरातकी एलिसा गार्डनरले ३९ बलमा ६ चौका र ३ छक्कासहित सर्वाधिक ६० रन बनाइन् ।
दयालन हेमलताले ३३ बलमा ६ चौका र ३ छक्कासहित ५७ रन जोडिन् । अन्य ब्याटरले भने राम्रो प्रदर्शन गर्न सकेनन् । गुजरातकी राजेश्वरी गायकवाड र पार्शवी चोपराले दुई दुई विकेट लिए ।

मुम्बई ६ खेलमा ५ मा जित र १ मा हारसहित १० अंकका साथ शीर्ष स्थानमा छ । दिल्ली ६ खेलमा ४ मा जित र २ मा हारसहित ८ अंकका साथ दोस्रो स्थानमा छ । युपी ७ खेलमा ४ मा जित र ३ मा हारसहित ८ अंकका साथ तेस्रो स्थानमा छ ।

बेंगलोर ७ खेलमा २ मा जित र ५ मा हारसहित ४ अंकका साथ चौथो स्थानमा छ । गुजरात ८ खेलमा २ मा जित र ६ मा हारसहित ४ अंकका साथ पुछारमा रहेर अन्त्य गरेको छ । शीर्ष टोली सोझै फाइनलमा पुग्नेछ । दोस्रो र तेस्रो स्थानमा रहने टोलीले फाइनलमा स्थान बनाउन एलिमिनेटरमा प्रतिस्पर्धा गर्नुपर्ने हुन्छ ।