एजेन्सी – ज्याक्स कालिसको उत्कृष्ट प्रदर्शनमा वल्र्ड जायन्ट्सले लेजेन्ड्स क्रिकेट लिग मास्टर्सको फाइनलमा नेपाली क्रिकेट टोलीका पूर्वकप्तान पारस खड्का सम्मिलित एसिया लायन्सलाई १ सय ४८ रनको मध्यम लक्ष्य दिएको छ।
दोहामा टस जितेर पहिला ब्याटिङ रोजेको जायन्ट्सले निर्धारित २० ओभरमा ४ विकेट गुमाउँदै १ सय ४७ रन बनायो । दक्षिण अफ्रिकी महान् अलराउन्डर ज्याक्स कालिस ५३ बलमा ५ चौका र ३ छक्कासहित ७६ रनमा नटआउट रहे ।
न्युजिल्यान्डका रस टेलर ३३ बलमा ३ चौकासहित ३२ रनमा आउट भए । एक समय १९-३ को खराब सुरुवात गरेको जायन्ट्सलाई चौथो विकेटका लागि कालिस र टेलरले ९२ रनको साझेदारी गरेका थिए । टेलर थिसेरा परेराको बलमा बोल्ड भए ।
ओपनर मोर्ने भ्यान विकलाई अब्दुर रजाकले शून्यमा बोल्ड गरे । कप्तान शेन वाटसन पनि शून्यमा एलबिडब्लू आउट भएपछि जायन्ट्सले खराब सुरुवात गरेकोा थियो । ओपनर लेन्डल सिमन्स १६ बलमा १ चौका र १ छक्कासहित १७ रनमा रन आउट भए ।
एसियाका अब्दुर रजाकले ४ ओभरमा १४ रन खर्चेर २ विकेट लिए । थिसेरा परेराले एक विकेट लिए । पारस खड्का एसियाको प्लेइङ ११ मा रहेपनि बलिङको अवसर भने पाएनन् ।
