काठमाडौं (हाम्रो खेलकुद) – लुम्बिनी प्रदेश सरकारले नेपाललाई यू–१९ विश्वकप पुर्याउने र आइसिसी विश्वकप लिग-२ मा उत्कृष्ट प्रदर्शन गर्दै सोझै विश्वकप छनोटमा पुर्याउने आफ्ना खेलाडीलाई सम्मान गर्ने भएको छ।

लुम्बिनीले आफ्नो प्रदेशका यू-१९ विश्वकपमा पुर्याउने खेलाडीलाई जनही ५० हजार र जिम्बावेमा हुने एकदिवसीय विश्वकप छनोटमा पुर्याउने खेलाडीलाई जनही एक लाख रुपैयाँले सम्मान गर्ने भएको छ । लुम्बिनी प्रदेशबाट यू-१९ विश्वकप छनोट खेल्ने पाँच र सिनियर खेल्न ६ खेलाडी थिए ।

नेपालले अघिल्लो महिना आइसिसी यू१९ विश्वकप एसिया क्षेत्र छनोटमा युएईलाई ७ रनले हराउँदै २०२४ मा जिम्बावेमा हुने यू१९ विश्वकपमा स्थान बनाएको थियो । त्यस्तै लिग २ मा पछिल्ला १२ मध्य ११ खेलमा जित हात पार्दै नेपालले शीर्ष तीनमा रहँदै सोझै विश्वकप छनोटमा पुग्नुको साथै आगमी चार वर्षको लागि ओडिआई मान्यता जोगाएको थियो ।

कप्तान देव खनाल (रुपन्देही), तीव्र गतिका बलर दुर्गेश गुप्ता (रुपन्देही), ब्याटर आकाश त्रिपाठी (कपिलबस्तु), अलराउन्डर विशाल विक्रम केसी (बर्दिया) र विकेटकिपर उत्तम थापामगर (अर्घाखाँची) गरि पाँच खेलाडीले यू१९ विश्वकप एसिया क्षेत्र छनोट खेलेका थिए ।

सिनियर टोलीतर्फ ओपनर कुशल भुर्तेल (रुपन्देही), कप्तान रोहित पौडेल (नवलपरासी), अलराउनडर कुशल मल्ल (रुपन्देही), स्पिनर मौसम ढकाल (रुपन्देही), तीव्र गतिका बलर सोमपाल कामी (गुल्मी) र प्रतिश जि.सी (प्यूठान) गरि ६ खेलाडी थिए ।

लुम्बिनीबाट प्राविधिकतर्फ तीन जना भएपनि उनीहरुलाई भने नगद रुपैयाँसहित सम्मान नगर्ने भएको छ । सिनियर टोलीका साहयक प्रशिक्षक बसन्त शाही ठकुरी, ब्याटिङ प्रशिक्षक आकाश गुप्ता र फिजियो विक्रम न्यौपाने थिए । यी तीनैजना रुपन्देहीका हुन् ।