एजेन्सी – अष्ट्रेलियाले तेस्रो तथा अन्तिम निर्णायक ओडिआई खेलमा घरेलु टोली भारतलाई २ सय ७० रनको प्रतिस्पर्धात्मक लक्ष्य दिएको छ ।

चेन्नइमा टस जितेर पहिला ब्याटिङ रोजेको अष्ट्रेलिया ४९ ओभरमा २ सय ७९ रनमा अल आउट भयो ।अष्ट्रेलियाका ओपनर मिचेल मार्शले ४७ बलमा ८ चौका र १ छक्कासहित सर्वाधिक ४७ रन बनाए ।

अष्ट्रेलियालाई ओपनर ट्रविस हेड र मिचेल मार्शले पहिलो विकेटका लागि १०.५ ओभरमा ६८ रनको साझेदारी गर्दै राम्रो सुरुवात दिलाए । हार्दिक पाड्याको बलमा ठूलो सट खेलेका हेड डिप स्क्वायर लेगमा कुलदिप यादवबाट ३३ रनमा क्याच आउट भए । उनले ३१ बलमा ४ चौका र २ छक्का हाने ।

हार्दिकले आक्रमक ब्याटिङ गरेका मार्श बोल्ड आउट भएपछि लगातार विकेट गुमायो । स्टिभ स्मिथ हार्दिक पान्ड्याको बलमा एज लागेर विकेटकिपर लोकेश राहुलबाट शुन्यमा क्याच आउट भए ।

मार्नश लाबुसेन २८, डेविड वार्नर २३ र मार्कस स्टोइनिस २५ रनमा आउट भए । वार्नरले पहिलो पटक चौथो नम्बरमा ब्याटिङ गरेका थिए । विकेटकिपर एलेक्स केरि ४६ बलमा २ चौका र १ छक्कासहित ३८, शन एबोट २६, एश्टन अगर १७, मिचेल स्टार्क र एडम जाम्पाले १०-१० रन बनाए ।

भारतका हार्दिक पान्ड्याले ८ ओभरमा ४४ रन खर्चेर ३ विकेट लिए । कुलदिप यादवले १० ओभरमा १ मेडन्सहित ५६ रन खर्चेर ३ विकेट लिए । मोहम्मद शिराज र अक्षर पटेलले दुई दुई विकेट लिए ।

तीन खेलको सिरिज १-१ को बराबरी अवस्थामा छ । पहिलो खेलमा भारत ५ विकेट र दोस्रो खेलमा अष्ट्रेलिया १० विकेटले विजयी भएको थियो ।