एजेन्सी – अष्ट्रेलियाले घरेलु टोली भारतलाई तेस्रो ओडिआई खेलमा बुधबार २१ रनले हराउँदै सिरिज जितेको छ । अष्ट्रेलियाले तीन ओडिआई खेलको सिरिज २-१ ले जित्यो । पहिलो खेल ५ विकेटले हारेपनि त्यसपछि उत्कृष्ट पूनरागमनका साथ १० विकेट र २१ रनले जित्दै अष्ट्रेलियाले सिरिज जितेको थियो ।

योसँगै अष्ट्रेलियाले भारतको घरेलु मैदानमा २०१९ देखि अपराजित सिरिज उपाधि यात्रामा पूर्णविराम लगाएको छ । २०१८ देखि भारतले घरेलु मैदानमा दुई सिरिज मात्रै गुमाएको छ । पछिल्ला ७ ओडिआई सिरिज लगातार जितेको थियो ।

पछिल्लो पटक भारतले घरेलु मैदानमा ओडिआई सिरिज अष्ट्रेलियासँग नै २०१९ मा ३-२ ले गुमाएको थियो । २०१९ मार्चमा स्टिभ स्मिथ र डेविड वार्नर विनाको अष्ट्रेलियाले पाँच ओडिआई खेलको सिरिज ३-२ ले जितेको थियो ।

उक्त सिरिजमा पनि अष्ट्रेलियाले सुरुवाती दुई खेल ६ विकेट र ८ रनले पराजित भएको थियो । त्यसपछि सानदार पूनरागमन गर्दै ३२ रन, ४ विकेट र ३५ रनले जित्दै सिरिज जितेको थियो । उक्त समय बल टेम्परिङ काण्डको कारण स्मिथ र वार्नर थिएनन् ।
त्यसपछि घरेलु मैदानमा भारतले लगातार ७ सिरिज उपाधि जितेको थियो ।

भारतले २०१९ मा वेस्टइन्डिज, २०२० मा अष्ट्रेलिया र २०२१ मा इंग्ल्यान्डसँगको तीन ओडिआई खेलको सिरिज समान २-१ ले जितेको थियो । त्यस्तै वेस्टइन्डिजसँग तीन खेलको सिरिज २०२२ मा ३-० र दक्षिण अफ्रिकासँग तीन खेलको सिरिज २-१ ले जितेको थियो । त्यस्तै श्रीलंकासँग २०२३ मा तीन खेलको सिरिज र न्युजिल्यान्डसँग समान ३-० ले जितेको थियो ।

भारतलाई उसकै भूमिका हराउन ओपनर मिचेल मार्श र मिचेल स्टार्कको प्रदर्शन उत्कृष्ट रह्यो । मार्शले तीन खेलमा १ सय ९४ रन बनाउँदै प्लेयर अफ द सिरिज चुनिए । मार्शले पहिलो खेलमा ८१, दोस्रो खेलमा ६६ र तेस्रो खेलमा ४७ रन बनाएका थिए ।
मिचेल स्टार्कले तीन खेलमा ८ विकेट लिए ।

स्टार्कले पहिलो खेलमा तीन र दोस्रो खेलमा स्टार्कले पाँच विकेट लिएका थिए । स्टिभ स्मिथको कप्तानी पनि सिरिजमा सानदार रह्यो । भारतीय क्रिकेट टोलीका ब्याटर सूर्यकुमार यादव भने तीनै खेलमा गोल्डेन डक आउट भए । सुरुवाती दुई खेलमा मिचेल स्टार्क र तेस्रो खेलमा एश्टन अगरको बलमा आउट भएका थिए ।

यो सिरिज जितसँगै अष्ट्रेलिया ओडिआई वरियतामा शीर्ष स्थानमा उक्लिएको छ । भारत दोस्रो, न्युुजिल्यान्ड तेस्रो र इंग्लयान्ड चौथो स्थानमा छ । नेपाल भने १५ औं स्थानमा छ ।