काठमाडौं (हाम्रो खेलकुद) – नेपाली क्रिकेट टोलीका बायाँ हाते तीव्र गतिका बलर प्रतिश जि.सीलाई झिमरुक गाउँपालिकाले नगद एक लाख रुपैयाँसहित सम्मान गरेको छ । आइसिसी विश्वकप लिग २ मा रहँदै नेपाललाई शीर्ष तीनमा रहँदै सोझै विश्वकप छनोट पुर्याउन र ओडिआई मान्यता जोगाउन योगदान दिएका प्रतिशलाई झिमरुकले बिहीबार गाउँपालिका भवन भ्याउतेमा सम्मान गरेको हो ।

झिमरुक गाउँपालिका वडा नम्बर ३ लामासेराका प्रतिशले घरेलु क्रिकेट भने काठमाडौंबाट खेल्ने गर्दछन् । प्रतिशले तीन साता अघि आइसिसी विश्वकप लिग-२ त्रिकोणात्मक ओडिआई सिरिजमा दुबई इन्टरनेशल क्रिकेट स्टेडियममा पपुवा न्युगिनीविरुद्ध डेब्यू गरेका थिए ।

उनले घरेलु टोली युएईविरुद्ध खेल्दै राम्रो प्रदर्शन गरेका थिए । घरेलु मैदान टियुमा पपुवा न्युगिनी र युएईसँगको त्रिकोणात्मक ओडिआई सिरिजमा पनि प्रतिश नेपाली टोलीमा रहेपनि खेल्ने मौका पाएका थिएनन् ।

त्यस्तै प्रतिशलाई झिमरुक गाउँपालिका उपाध्यक्ष प्रमोद पोख्रेल र पोख्रेल पाउन्डेसनले समान ५० हजारले सम्मान गरेका छन् । प्रतिश प्यूठान जिल्लाबाट नेपाली क्रिकेट टोलीमा खेल्ने पहिलो खेलाडी बनेका छन् ।

प्रतिशले नेपालको यू-१९ र यू-१६ दुवै खेलेका छन् । घरेलु क्रिकेट भने उनले बागमती प्रदेशबाट खेल्ने गर्दछन् । प्यूठानबाट प्रतिशपछि स्पिनर तुलबहादुर थापाले लुम्बिनी प्रदेशबाट राष्ट्रिय प्रतियोगिता खेलेका छन् । तुल यू-१९ टोलीको बन्द प्रशिक्षणमा पनि परेका थिए । बायाँ हाते बलर प्रतिश तल्लोक्रममा राम्रो ब्याटिङको क्षमता राख्ने गर्दछन् ।