काठमाडौं (हाम्रो खेलकुद) – सुदूरपश्चिम प्रदेशले तेस्रो संस्करणको ललितपुर मेयर्स वुमन्स च्याम्पियनसिप टि२० प्रतियोगितामा ललितपुर मेयर्स ११ लाई ५१ रनले हराउँदै विजयी सुरुवात गरेको छ ।

जितको लागि १ सय ३८ रनको विजयी लक्ष्य पछ्याएको ललितपुरले निर्धारित २० ओभरमा ७ विकेट गुमाउँदै ८६ रन बनायो । ललितपुरकी ओपनर लक्ष्मी चौधरीले ३८ बलमा २ चौकासहित सर्वाधिक २५ रन बनाइन् ।

कन्चन श्रेष्ठले १६ र हेलिसा गुरुङले १९ रन बनाइन् । अन्य ब्याटरले दोहोरो अंकमा रन बनाउन सकेनन् । सोनी पाख्रिन ३, सीमाना केसी २, अश्मिना कर्माचार्य ८ र सुजता थापा शून्यमा आउट भइन् । सुदूरकी ऋतु कनोजियाले ४ ओभरमा १२ रन खर्चेर २ विकेट लिइन् । ललितपुरका पाँच खेलाडी रन आउट भएका थिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको सुदूरले निर्धारित २० ओभरमा ३ विकेट गुमाउँदै १ सय ३७ रन बनाएको थियो । सुदूरको जितमा सम्झना खड्काले ४५ बलमा ६ चौकासहित सर्वाधिक ५१ रनको अविजित योगदान दिइन् । आक्रामक ब्याटर कविता जोशी २८ बलमा २ चौका र १ छक्कासहित २७ रनमा अविजित रहिन् ।

चौथो विकेटका लागि कविता र सम्झनाले ६७ रनको अविजित साभेदारी गरेका थिए । तीव्र गतिकी बलर सोनी पाख्रिनले चौथो ओभरको पाँचौं बलमा ओपनर विन्दु रावललाई १८ रनमा बोल्ड आउट गरिन् ।

कप्तान विन्दुले १४ बलमा ४ चौका प्रहार गरिन् । कृतिका मरासिनीले १२ औं ओभरको पहिलो बलमा रुबि पोदारलाई २८ रनमा क्याच गराइन् । उनले ३३ बलमा ४ चौका प्रहार गरिन् । रेवति धामी शून्यमा कृतिकाको बलमा एलबीडब्लू आउट भइन् ।

ललितपुरकी कृतिका मरासिनीले ४ ओभरमा १ मेडनसहित २४ रन खर्चेर २ विकेट लिइन् । सोनी पाख्रिनले ४ ओभरमा २८ रन खर्चेर १ विकेट लिइन् । कप्तान अस्मिना कर्माचार्यले ३ ओभरमा २० रन खर्चिन् । प्रतियोगितामा ५ टोली छन् ।

प्रधामन्त्री कपका चार सेमिफाइनल टोली कोशी प्रदेश, सुदूरपश्चिम प्रदेश, नेपाल एपिएफ क्लब र मधेश प्रदेशसँगै ललितपुर ११ छन् । ललितपुर ११ बाट प्रधानमन्त्री कपमा सेमिफाइनलमा नपुगेका प्रदेशका टोलीबाट टिम निर्माण गरिएको छ ।

दोस्रो खेलमा नेपाल एपिएफ क्लब र मधेश प्रदेशबीच प्रतिस्पर्धा हुँदैछ । शुक्रबार सुदूरले एपिएफसँग खेल्नेछ । ललितपुरले कोशी प्रदेशसँग खेल्न्ेछ ।