काठमाडौं (हाम्रो खेलकुद) – मधेश प्रदेशले तेस्रो संस्करणको ललितपुर मेयर वुमन्स च्याम्पियनसिप टि२० प्रतियोगितामा नेपाल एपिएफ क्लबलाई ५९ रनको सामान्य लक्ष्य दिएको छ ।

टियु क्रिकेट मैदानमा टस हारेर पहिला ब्याटिङको निम्तो पाएको मधेश १९.४ ओभरमा ५८ रनमा अल आउट भयो । मधेशकी युवा ब्याटर साना प्रविनले ४५ बलमा २ चौकासहित सर्वाधिक २५ रन बनाइन् । अन्य कुनैपनि मधेशका ब्याटरले दोहोरो अंकमा रन बनाउन सकेनन् । मधेशका १० खेलाडीले दोहोरो अंकमा रन जोड्न सकेनन् ।

तीव्र गतिकी बलर रेखा रावलले पहिलो ओभरको पाँचौं बलमा ओपनर अनुराधा चौधरीलाई शून्यमा बोल्ड गरिन् । सोनी खड्काले चौथो ओभरको दोस्रो बलमा एलिसा यादवलाई एक रनमा बोल्ड गरिन् । एक बलपछि प्रतिमा साह शून्यमा एलबीडब्लू आउट भइन् ।

चौथो विकेटका लागि साना र सीमा कुँवरले २६ रनको साझेदारी गरे । सीताराना मगरले सीमालाई २६ बलमा १ चौकासहित ८ रनमा बोल्ड गरिन् । साना इन्दु बर्माको बलमा बोल्ड भइन् ।

सरस्वीतकुमारी चौधरी ५ र रोजी कडारी एक रनमा आउट भइन् । एपिएफकी तीव्र गतिकी बलर सोनु खड्काले २.४ ओभरमा ९ रन खर्चेर सर्वाधिक ४ विकेट लिइन् ।

कप्तान सीताराना मगरले ४ ओभरमा १ मेडनसहित ७ रन खर्चेर ३ विकेट लिइन् । रेखा रावल, नेरी थापा र इन्दु बर्माले एक एक विकेट लिए ।