काठमाडौं (हाम्रो खेलकुद) – कप्तान सीताराना मगर र तीव्र गतिकी बलर सोनु खड्काको उत्कृष्ट प्रदर्शनमा नेपाल एपिएफ क्लबले ललितपुर मेयर वुमन्स च्याम्पियनसिप टि२० प्रतियोगितामा मधेश प्रदेशलाई १० विकेटले हराएको छ।

जितको लागि ५८ रनको सामान्य विजयी लक्ष्य पछ्याएको एपिएफले ७.३ ओभरमा कुनै विकेट नगुमाई पूरा गर्यो । एपिएफको जितमा कप्तान सीताराना मगर ३६ बलमा ९ चौकासहित ४५ रनमा अविजित रहिन् । ज्योति पाण्डे १० बलमा ८ रनमा अविजित रहिन् ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको मधेश १९.४ ओभरमा ५८ रनमा अल आउट भएको थियो । मधेशकी युवा ब्याटर साना प्रविनले ४५ बलमा २ चौकासहित सर्वाधिक २५ रन बनाइन् । जुन जितको लागि पर्याप्त थिएन । मधेशका १० खेलाडीले दोहोरो अंकमा रन जोड्न सकेनन् ।

तीव्र गतिकी बलर रेखा रावलले पहिलो ओभरको पाँचौं बलमा ओपनर अनुराधा चौधरीलाई शून्यमा बोल्ड गरिन् । सोनी खड्काले चौथो ओभरको दोस्रो बलमा एलिसा यादवलाई एक रनमा बोल्ड गरिन् । एक बलपछि प्रतिमा साह शून्यमा एलबीडब्लू आउट भइन् ।

चौथो विकेटका लागि साना र सीमा कुँवरले २६ रनको साझेदारी गरे । सीताराना मगरले सीमालाई २६ बलमा १ चौकासहित ८ रनमा बोल्ड गरिन् । साना इन्दु बर्माको बलमा बोल्ड भइन् ।

सरस्वीतकुमारी चौधरी ५ र रोजी कडारी एक रनमा आउट भइन् । एपिएफकी तीव्र गतिकी बलर सोनु खड्काले २.४ ओभरमा ९ रन खर्चेर सर्वाधिक ४ विकेट लिइन् । कप्तान सीताराना मगरले ४ ओभरमा १ मेडनसहित ७ रन खर्चेर ३ विकेट लिइन् । रेखा रावल, नेरी थापा र इन्दु बर्माले एक एक विकेट लिए ।

पहिलो खेलमा सुदूरपश्चिम प्रदेशले ललितपुर मेयर्स ११ लाई ५१ रनले हराउँदै विजयी सुरुवात गरेको छ । प्रधामन्त्री कपका चार सेमिफाइनल टोली कोशी प्रदेश, सुदूरपश्चिम प्रदेश, नेपाल एपिएफ क्लब र मधेश प्रदेशसँगै ललितपुर-११ छन् । ललितपुर ११ बाट प्रधानमन्त्री कपमा सेमिफाइनलमा नपुगेका प्रदेशका टोलीबाट टिम निर्माण गरिएको छ । शुक्रबार सुदूरले पहिलो खेलमा एपिएफसँग खेल्नेछ। ललितपुरले कोशी प्रदेशसँग खेल्नेछ ।