काठमाडौं (हाम्रो खेलकुद) – अनुभवी खेलाडी ऋतु कनोजियाको अलराउन्ड प्रदर्शनमा सुदूरपश्चिम प्रदेशले ललितपुर मेयर्स वुमन्स च्याम्पियनसिप टि२० प्रतियोगितामा मधेश प्रदेशलाई ७ विकेटले हराएको छ । दोस्रो जितका साथ सुदूरपश्चिम अंक तालिकामा दोस्रो स्थानमा उक्लिएको छ ।
जितको लागि ६६ रनको विजयी लक्ष्य पछ्याएको सुदूरपश्चिमले १०.३ ओभरमा ३ विकेट गुमाउँदै पूरा गर्यो । सुदूरको जितमा ऋतु कनोजिया २७ बलमा २ चौकासहित २१ रनमा अविजित रहिन् । रुबी पोदार ११ बलमा २ चौकासहित १४ रनमा अविजित रहिन् ।
ओपनर कविता कुँवर एक रनमा क्याच आउट भइन् । सम्झना खड्का ९ र विन्दु रावल १० रनमा आउट भए । मधेशका सरस्वती कुमारी चौधरी, सन्तोषी चौधरी र अनुराधा चौधरीले एक एक विकेट लिइन् ।
त्यसअघि टियु क्रिकेट मैदानमा टस जितेर पहिला ब्याटिङको रोजेको मधेश १९ ओभरमा ६५ रनमा अल आउट भयो । मधेशकी एलिसा यादव २३ बलमा ३ चौकासहित १५ रनमा आउट भइन् । सरस्वती कुमारी चौधरी २१ बलमा २ चौकासहित १५ रनमा आउट भइन् ।
मधेशका अन्य कुनैपनि ब्याटरले दोहोरो अंकमा रन बनाउन सकेनन् । ओपनर सीमा कुँवर १, साना प्रविन ९, प्रतिमा साह २, अनुराधा चौधरी १, रोजी कडारी ३, अमिरान निशा र कविता गौतमले ४–४ रन बनाइन् ।
सुदूरकी लक्ष्मी साउदले ४ ओभरमा १५ रन खर्चेर ३ विकेट लिइन् । ऋतु कनोजियाले ४ ओभरमा २ मेडनसहित ४ रन खर्चेर २ विकेट लिइन् । सम्झना खड्काले १ ओभरमा ८ रन खर्चेर २ विकेट लिइन् । कविता जोशी र इश्वरी विष्टले एक एक विकेट लिइन् ।
एपिएफ २ खेलमा ४ अंकका साथ शीर्ष स्थानमा छ । सुदूर ३ खेलमा २ मा जित र १ मा हारसहित ४ अंकका साथ दोस्रो स्थानमा छ । मधेश दुबै खेलमा हारसहित पुछारमा छ । मधेशले सोमबार ललितपुर मेयर्स ११ सँग खेल्नेछ । सुदूरपश्चिम प्रदेशले सोमबार प्रदेश एकसँग खेल्नेछ ।
