काठमाडौं (हाम्रो खेलकुद) – कप्तान सीताराना मगरको उत्कृष्ट बलिङसँगै कोशी प्रदेशले ललितपुर मेयर्स वुमन्स च्याम्पियनसिप टि२० प्रतियोगितामा नेपाल एपिएफ क्लबलाई ८८ रनको मध्यम लक्ष्य दिएको छ।
टियु क्रिकेट मैदानमा टस जितेर पहिला ब्याटिङ रोजेको कोशीले निर्धारित २० ओभरमा ५ विकेट गुमाउँदै ८७ रन बनायो । कोशीकी ओपनर काजल श्रेष्ठले ४१ बलमा १ चौका र १ छक्कासहित सर्वाधिक २९ रन बनाइन् ।
ओपनर काजोल र रुविना क्षेत्री बेलबासेले पहिलो विकेटका लागि ८.२ ओभरमा ३४ रनको साझेदारी गरेका थिए । रुविना सीताको लेग साइडको बलमा स्वीप खेल्ने धुनमा मिस हुँदा २४ रनमा बोल्ड आउट भइन् । रुविनाले ३४ बलमा ५ चौका प्रहार गरिन् ।
दोस्रो विकेटका लागि काजोल र अप्सरीले ३१ रनको साझेदारी गरेका थिए । सीताले १७ औं ओभरको दोस्रो बलमा काजोललाई विकेटकिपर ज्योति पाण्डेले स्टम्पिङ आउट गरिन् । एक बलपछि सबन राइ शून्यमा बोल्ड भइन् ।
युवा ब्याटर स्मृति कटवाल ७ बलमा १ चौकासहित ८ रनमा रन आउट भइन् । अप्सरी बेगम ३६ बलमा २२ रनमा आउट भइन् ।एपिएफकी सीताले ४ ओभरमा ११ रन खर्चेर ३ विकेट लिइन् । इन्दु बर्माले २ ओभरमा १२ रन खर्चेर १ विकेट लिइन् ।
