काठमाडौं (हाम्रो खेलकुद) – नेपाल एपिएफ क्लबकी कप्तान सीताराना मगर ललितपुर मेयर्स वुमन्स च्याम्पियनसिप टि२० प्रतियोगितामा प्लेयर अफ द म्याचमा ह्याट्रिक गरेकी छिन् ।
एपिएफलाई लगातार तीन खेल जित दिलाउँदै एक खेल अगावै फाइनलमा पुर्याउन उत्कृष्ट अलराउन्ड प्रदर्शन गरेकी सीताले प्लेयर अफ द म्याचमा ह्याट्रिक गरेकी हुन् । शनिबार एपिएफले कोशीलाई ७ विकेटले हराउन सीताले ४ ओभरमा ११ रन खर्चेर ३ विकेट बनाउनुको साथै २० बलमा ३ चौकासहित १९ रन बनाएकी थिइन् ।
दोस्रो खेलमा सुदूरपश्चिम प्रदेशलाई १५ रनले हराउन सीताले ५९ बलमा ७ चौकासहित ५२ रनमा अविजित रहनुको साथै ४ ओभरमा २४ रन खर्चेर १ विकेट लिएकी थिइन् ।
त्यस्तै पहिलो खेलमा मधेश प्रदेशलाई १० विकेटले हराउन सीताले ७ ओभरमा १ मेडनसहित ७ रन खर्चेर ३ विकेट लिनुको साथै ३६ बलमा ९ चौकासहित ४५ रनमा अविजित रहेकी थिइन् । तीनै खेलमा सीता प्लेयर अफ द म्याच चुनिन् । हरेक खेलमा प्लेयर अफ द म्याच हुने खेलाडीले ५ हजार प्राप्त गर्ने गर्दछन् ।
एपिएफले समूह चरणको अन्तिम खेल मंगलबार ललितपुर-११ सँग खेल्नेछ । कोशीले सोमबार सुदूरपश्चिमसँग खेल्नेछ । कोशी र सुदूरबीचको विजेताले फाइनल खेल्ने उच्च सम्भावना देखिन्छ । फाइनल बिहीबार हुनेछ ।
एपिएफ ३ खेलमा ६ अंकका साथ शीर्षस्थानमा छ । सुदूरपश्चिम ३ खेलमा २ मा जित र १ मा हारसहित ४ अंकका साथ दोस्रो स्थानमा छ । कोशी प्रदेश २ खेलमा १ मा जित र १ मा हारसहित २ अंकका साथ तेस्रो स्थानमा छ । ललितपुर र मधेश समान दुई खेल खेल खेलेपनि जित विहीन हुँदै चौथो र पाँचौं स्थानमा छन् ।
