एजेन्सी – क्यानडाले आइसिसी विश्वकप क्वालिफायर प्लेअफमा जर्सीलाई ३१ रनले हराउँदै विजयी सुरुवात गरेकोछ । जितको लागि २ सय ३९ रनको विजयी लक्ष्य पछ्याएको जर्सी ४७.५ ओभरमा २ सय ७ रनमा अल आउट भयो ।

जर्सीका जोश लरेन्सनले १ सय १ बलमा ४ चौकासहित सर्वाधिक ६६ रन बनाएपनि टोलीको हार टार्न सकेनन् । निकोलस ग्रीनवुडले ७० बलमा ५ चौका र २ छक्कासहित ५९ रन बनाए । एक समय ३४.५ ओभरमा १६३–३ को अवस्थामा रहेपनि मध्यक्रम र तल्लोक्रमका ब्याटर नचल्दा जर्सी पराजित हुन पुगेको छ । जर्सीले ओडिआईमा पहिलो पटक यसै खेलबाट डेब्यू गरेको छ । आइसिसीले प्लेअफका सबै खेललाई ओडिआई मान्यता दिएपछि जर्सीले डेब्यू गरेको हो ।

क्यानडाका कप्तान साद बिन जाफरले १० ओभरमा ५१ रन खर्चेर सर्वाधिक ३ विकेट लिए । त्यस्तै जेरेमी गोर्डनले ८.५ ओभरमा ३० रन खर्चेर ३ विकेट लिए । निखिल दत्तले ९ ओभरमा १ मेडनसहित ३० रन खर्चेर १ विकेट लिए ।

त्यसअघि युनाइटेड क्रिकेट क्लब ग्राउन्डमा टस हारेर पहिला ब्याटिङको निम्तो पाएको क्यानडालो निर्धारित ५० ओभरमा ८ विकेट गुमाउँदै २ सय ३८ रन बनायो । क्यानडा ओडिआईमा २०१४ पछि फर्किएको हो । क्यानडाका विकेटकिपर विजयरत्ने श्रीमन्थाले ९१ बलमा ८ चौकासहित सर्वाधिक ६३ रन बनाए ।

निखिल दत्त ८२ बलमा ५ चौका र ३ छक्कासहित ५६ रनमा आउट भए । ओपनर आरोन जोनसन ४ र पर्गत सिंह ११ रनमा आउट भए । हर्ष थकेर ४७ बलमा १ चौका र १ छक्कासहित २७ रनमा आउट भए ।

जर्सीका चाल्र्स पेर्चर्ड १० ओभरमा १ मेडनसहित ३८ रन खर्चेर ३ विकेट लिए । बेन्जामेन वार्डले १० ओभरमा १ मेडनसहित ३५ रन खर्चेर २ विकेट लिए । जुलिस सुमिराउरले १० ओभरमा ४२ रन खर्चेर २ विकेट लिए । जर्सीले दोस्रो खेल बिहीबार नामिबियासँग खेल्नेछ । क्यानडाले बुधबार अमेरिकासँग खेल्नेछ ।

प्रतियोगितामा जर्सी, क्यानडा, अमेरिका, युएई, पपुवा न्युनिगी र नामिबिया छन् । हरेक टोलीले एक अर्कासँग प्रतिस्पर्धा गरेपछि शीर्ष दुई टोलीले आगमी जुन जुलाईमा जिम्बावेमा हुने विश्वकप छनोटमा स्थान बनाउनेछन् ।

अमेरिका र नामिबियाले लिग २ बाटनै ओडिआई जोगाई सकेका छन् । यदि क्यानडाले पपुवा न्युगिनी र युएईलाई पछि पारे ओडिआई मान्यता प्राप्त गर्नेछ । ओडिआई मान्यताको लागि जर्सी, क्यानडा, युएई र पपुवा न्युगिनीबीचको खेलको नतिजा मात्रै मान्यता हुनेछ ।