एजेन्सी – युएईले आइसिसी विश्वकप क्वालिफायर प्लेअफ पपुवा न्युगिनीमाथि २१ रनको महत्वपूर्ण जित हात पारेको छ । पपुवा न्युगिनीमाथि जितको साथ युएईले ओडिआई मान्यता सम्भावना मजबुत बनाएकोछ ।

जितको लागि २ सय ६१ रनको मध्यम विजयी लक्ष्य पछ्याएको पपुवा न्युगिनी ४८.३ ओभरमा २ सय ३९ रनमा अल आउट भयो । पपुवा न्युगिनीका ओपनर किप्लिङ डोरिगाले ७१ बलमा ७ चौका र ४ छक्कासहित ७३ रनको उत्कृष्ट इनिङ खेलेपनि टोलीको हार टार्न सकेनन् । अर्का ओपनर टोनी उराले ५६ बलमा ६ चौका र १ छक्कासहित ५६ रन जोडेपनि मध्यक्रम र तल्लोक्रमका ब्याटर चल्न नसक्दा पराजित भयो ।

पपुवा न्युगिनीलाई ओपनर किप्लिङ डोरिगा र टोनी उराले पहिलो विकेटका लागि २०.३ ओभरमा १ सय ४६ रनको सानदार शतकीय साझेदारीका साथ उत्कृष्ट सुरुवात दिलाएका थिए । तर मध्यक्रम र तल्लोक्रम चल्न नसक्दा नाटकीय रुपमा पराजित भयो ।

डोरिगा स्पिनर कार्तिक मयाप्पनको बलमा कट एण्ड बोल्ड आउट भएपछि उक्त साझेदारी तोडिएको थियो । त्यसपछि अन्य ब्याटरले राम्रो गर्न सकेनन् । बाँकी १७ रन जोड्न प्रमुख ४ विकेट गुमाएपछि २५.३ ओभरमा १६३-५ को अवस्थामा पुगेको थियो । सेसे बाउ ७, असद भाला १, चाल्स अमिनी १५ र नर्मन भानुवा शून्यमा आउट भए । गौडी टोका २० र राइली हेकुरे ११ रनमा आउट भए ।

युएईका कार्तिक मयाप्पनले ८ ओभरमा १ मेडनसहित ४५ रन खर्चेर सर्वाधिक ४ विकेट लिए । जहुर खानले ८.४ ओभरमा ५८ रन खर्चेर ३ विकेट लिए । रोहन मुस्तफाले १० ओभरमा १ मेडनसहित १७ रन खर्चेर १ विकेट लिए । आयन र जुनैद सिद्दिकले एक एक विकेट लिए ।

त्यसअघि टस हारेर पहिला ब्याटिङको निम्तो पाएको युएईले निर्धारित ५० ओभरमा ७ विकेट गुमाउँदै २ सय ६० रन बनाएको थियो । युएईको जितमा अलराउन्डर आयन खानले ९४ बलमा ९ चौका र ३ छक्कासहित ९४ रनको सानदार अविजित इनिङ खेले । आयनको यो कुनैपनि अन्तर्राष्ट्रिय खेलको उत्कृष्ट प्रदर्शन हो ।

कप्तान मोहम्मद वासिमले १ सय ६ बलमा ५ चौका र ६ छक्कासहित सर्वाधिक ९६ रनको योगदान दिए । सेमा कमियाको बलमा टोनी उराबाट वासिम क्याच आउट भएपछि ओडिआई करिअरको दोस्रो शतक पूरा गर्न चार रनले चुकेका थिए । एक समय २०.४ ओभरमा ८९-५ को दयनीय अवस्थामा पुगेको युएईलाई छैटौं विकेटका लागि आयन र वासिमले ८० रनको महत्वपूर्ण साझेदारी गरेका थिए ।

आयन खानले २१ औं ओभरको अन्तिम बलमा सेमा कमियाले उनले खेलको दोस्रो बलमै शून्यमा क्याच छाडेका थिए । आयन खानले १५ रनमा जीवनदान पाएका थिए । राइली हेकुरेको २८ औं ओभरको तेस्रो बलमा पनि जीवनदान पाएका थिए ।

आयन लाक्रा ६ रनमा एलबीडब्लू, वृत्य अरविन्द गोल्डेन डक, रमिज शाहजाद ८ र आसिफ खान ६ रनमा आउट भए । सातौं विकेटका लागि आयन खान र कार्तिक मयाप्पनले ९० रनको सानदार साझेदारी गरे । कार्तिक ३६ बलमा १ चौकासहित २४ रनमा आउट भए ।

पपुवा न्युगिनीका चाद सोपरले १० ओभरमा २ मेडनसहित ४३ रन खर्चेर ४ विकेट लिएपनि टोलीको हार टार्न सकेनन् । सेमा कमियाले १० ओभरमा २ मेडनसहित ३८ रन खर्चेर २ विकेट लिए ।

प्रतियोगितामा जर्सी, क्यानडा, अमेरिका, युएई, पपुवा न्युनिगी र नामिबिया छन् । हरेक टोलीले एक अर्कासँग प्रतिस्पर्धा गरेपछि शीर्ष दुई टोलीले आगमी जुन जुलाईमा जिम्बावेमा हुने विश्वकप छनोटमा स्थान बनाउनेछन् ।

युएई र पपुवा न्युगिनीले लिग-२ मा ओडिआई मान्यता अवसर गुमाएका छन् । ओडिआई मान्यता बचाउन युएई र पपुवा न्युगिनी दुबैले जर्सी र क्यानडालाई पछि पार्नुपर्ने हुन्छ । ओडिआई मान्यताको लागि जर्सी, क्यानडा, युएई र पपुवा न्युगिनीबीचको खेलको नतिजा मात्रै मान्यता हुनेछ । त्यसैले चार टोलीबीचको प्रतिस्पर्धा निकै महत्वपूर्ण हुनेछ । अमेरिका र नामिबियाले भने लिग-२ बाटनै ओडिआई जोगाई सकेका छन् ।