काठमाडौं (हाम्रो खेलकुद) – मध्यक्रमकी बायाँ हाते ब्याटर राजमति ऐरी चल्दा नेपाल एपिएफ क्लबले ललितपुर मेयर्स वुमन्स च्याम्पियनसिप प्रतियोगितामा ललितपुर मेयर्स ११ लाई १ सय ११ रन बलियो लक्ष्य दिएको छ । टियु क्रिकेट मैदानमा टस जितेर पहिला ब्याटिङ रोजेको एपिएफले निर्धारित २० ओभरमा ६ विकेट गुमाउँदै १ सय १० रन बनायो ।
एपिएफकी राजमति ऐरी ५२ बलमा ४ चौकासहित ४१ रनमा अविजित रहिन् । मञ्जु मोकटी २ रनमा अविजित रहिन् । एक समय १०.४ ओभरमा ६०-५ को अवस्थामा पुगेको एपिएफलाई छैटौं विकेटको लागि बिनु बुढामगर र राजमति ऐरीले ४३ रनको साझेदारी गरेका थिए । बिनुले १६ बलमा १२ रन बनाइन् ।
ओपनर ज्योति पाण्डे ६, कप्तान सीताराना मगर १९ बलमा ३ चौकासहित १९, इन्दु बर्मा ७, रोमा थापा ४ र सरिता मगर ६ रनमा आउट भइन् ।
ललितपुरकी सीमाना केसीले ४ ओभरमा १६ रन खर्चेर २ विकेट लिइन् । सृष्टी जैशीले ४ ओभरमा १९ रन खर्चेर २ विकेट लिइन् । सोनी पाख्रिन र मनिषा उपाध्यायले एक एक विकेट लिइ्न् ।
एपिएफ सुरुवाती तीन खेल जित्दै फाइनलमा पुगि सकेको छ । ललितपुर सुरुवाती तीन हारका साथ फाइनल दौडबाट बाहिरि सकेको छ ।
