काठमाडौं (हाम्रो खेलकुद) – साविक विजेता नेपाल एपिएफ क्लब तेस्रो संस्करणको ललितपुर मेयर्स वुमन्स च्याम्पियनसिप टि२० प्रतियोगितामा ललितपुर मेयर्स ११ लाई ३७ रनले हराउँदै फाइनलमा पुगेको छ । राजमति ऐरीको अलराउन्ड प्रदर्शनमा एपिएफ अपराजित रहँदै फाइनलमा पुगेको हो ।

जितको लागि १ सय ११ रनको बलियो विजयी लक्ष्य पछ्याएको ललितपुरले निर्धारित २० ओभरमा ८ विकेट गुमाउँदै ७३ रन बनायो । ललितपुरकी सोनी पाख्रिनले १९ बलमा १ चौकासहित सर्वाधिक १५ रन बनाइन् । लक्ष्मी चौधरी र सीमना केसीले समान १० रन बनाए ।

ओपनर किरण कुँवर ३, कन्चन श्रेष्ठ ६, हेलिसा गुरुङ ३, अश्मिना कर्माचार्य ३ र सृष्टी जैशीले ७ रन बनाइन् । सुजता थापा ४ रनमा अविजित रहिन् ।

एपिएफकी राजमति ऐरीले ३ ओभरमा १ मेडनसहित ७ रन खर्चेर २ विकेट लिइन् । बिनु बुढामगरले ४ ओभरमा ९ रन खर्चेर २ विकेट लिइन् । इन्दु बर्मा, सीता रानामगर र सुष्मा श्रेष्ठले एक एक विकेट लिइन् ।

त्यसअघि टियु क्रिकेट मैदानमा टस जितेर पहिला ब्याटिङ रोजेको एपिएफले निर्धारित २० ओभरमा ६ विकेट गुमाउँदै १ सय १० रन बनाएको थियो । यसअघिको खेलमा एपिएफका मध्यक्रम र तल्लोक्रमका ब्याटरले खेल्ने अवसर पाएका थिएनन् । शीर्षक्रमका ब्याटरले खेल सकाएका आएका थिए ।

एपिएफकी मध्यक्रमकी बायाँ हाते ब्याटर राजमति ऐरी ५२ बलमा ४ चौकासहित ४१ रनको अविजित इनिङ खेलिन् । मञ्जु मोकटी २ रनमा अविजित रहिन् । एक समय १०.४ ओभरमा ६०-५ को अवस्थामा पुगेको एपिएफलाई छैटौं विकेटको लागि बिनु बुढामगर र राजमति ऐरीले ४३ रनको महत्वपूर्ण साझेदारी गरेका थिए । अनुभवी अलराउन्डर बिनुले १६ बलमा १२ रन बनाइन् ।

ओपनर ज्योति पाण्डे ६, कप्तान सीताराना मगर १९ बलमा ३ चौकासहित १९, इन्दु बर्मा ७, रोमा थापा ४ र सरिता मगर ६ रनमा आउट भइन् । ललितपुरकी सीमाना केसीले ४ ओभरमा १६ रन खर्चेर २ विकेट लिइन् । सृष्टी जैशीले ४ ओभरमा १९ रन खर्चेर २ विकेट लिइन् । सोनी पाख्रिन र मनिषा उपाध्यायले एक एक विकेट लिएका थिए ।

एपिएफ ४ खेलमा अपराजित हुँदै फाइनलमा पुगेको छ । आज कोशी र मधेशबीच प्रतिस्पर्धा हुँदैछ । उक्त खेलमा कोशी विजयी हुँदा सोझै फाइनलमा पुग्नेछ । यदि कोशी पराजित भएमा कोशीसँगै मधेश र सुदूरपश्चिमको समान ४ अंक हुनेछ । नेटरनरेटमा माथि रहने टोली फाइनलमा पुग्नेछ । फाइनल बिहीबार हुनेछ ।