काठमाडौं (हाम्रो खेलकुद) – विश्वकप विजेता दुई टोली वेस्टइन्डिज र श्रीलंकाले आगमी जुन जुलाईमा जिम्बावेमा हुने विश्वकप छनोट खेल्ने उच्च सम्भावना छ । आइसिसी विश्वकप सुपर लिगमा कमजोर प्रदर्शनपछि वेस्टइन्डिज र श्रीलंकाले सोझै आगमी अक्टोबर नोभेम्बरमा भारतमा हुने विश्वकप खेल्ने सम्भावना अंक गणीतिय झिनो आशा बाँकी छ ।

विश्वकप छनोट आगमी जुन १८ देखि जुलाई ९ सम्म जिम्बावेमा हुनेछ । आइसिसी विश्वकप लिग–२ का शीर्ष तीन टोली, विश्वकप सुपर लिगबाट पुछारका पाँच टोली र विश्वकप क्वालिफायर प्लेअफबाट दुई टोली आउनेछन् । सुपर लिगमा १२ टेस्ट टोलीसँगै नेदरल्यान्ड्स गरि कुल १३ देशले प्रतिस्पर्धा गरेका छन् । जसबाट भारतसहित शीर्ष आठ टोलीले सोझै विश्वकपमा पुग्नेछन् ।

भारत, पाकिस्तान, इंग्ल्यान्ड, अष्ट्रेलिया, अफगानिस्तान, बंगलादेश र न्युजिल्यान्ड सहित ७ टोली सोझै विश्वकप छनोटमा पुगेका छन् । अव दक्षिण अफ्रिका, श्रीलंका र वेस्टइन्डिज मध्य एक टोलीले सोझै विश्वकपमा स्थान बनाउनेछन् । जसमा दक्षिण अफ्रिकाको उच्च सम्भावना छ ।

जिम्बावे, नेदरल्यान्ड्स र आयरल्यान्डले विश्वकप छनोट खेल्ने पक्का भएको छ । दुई पटकको विश्वकप विजेता वेस्टइन्डिज २४ खलमा ९ मा जित र १५ मा हारसहित ८८ अंकका साथ आठौं स्थानमा छ । एक पटकको विश्वकप विजेता श्रीलंका २३ खेलमा ७ मा जित र १३ मा हारसहित ८२ अंकका साथ नवौं स्थानमा छ । दक्षिण अफ्रिका १९ खेलमा ७ मा जित र १० मा हारसहित ७८ अंकका साथ १० औं स्थानमा छन् ।

सुपर लिगमा जितमा १० अंक मिल्छ । दक्षिण अफ्रिकाले नेदरल्यान्ड्ससँग अन्तिम दुई खेल खेल्न बाँकी छ । दक्षिण अफ्रिका र नेदरल्यान्ड्सबीच शुक्रबार र आइतबार खेल हुनेछ । दक्षिण अफ्रिका दुबै खेलमा विजयी भएमा सोझै विश्वकपमा स्थान बनाउनेछ । दक्षिण अफ्रिका दुबै खेलमा विजयी हुँदा ९८ अंक हुनेछ । ९८ अंक शीर्ष आठमा रहेर विश्वकपमा स्थान बनाउन पर्याप्त हुनेछ ।

उता श्रीलंकाले अन्तिम खेल न्युजिल्यान्डसँग शुक्रबार खेल्नेछ । उक्त खेलमा श्रीलंका विजयी हुँदा ९२ अंक हुनेछ । श्रीलंका विश्वकप खेल्न अन्तिम खेलमा जितका साथै कम्तिमा दक्षिण अफ्रिकाले एक खेल हार्नुपर्ने हुन्छ । वेस्टइन्डिज विश्वकपमा पुग्न श्रीलंका र दक्षिण अफ्रिकाले बाँकी सबै खेल हार्नुपर्ने हुन्छ ।

दक्षिण अफ्रिकाले नेदरल्यान्ड्ससँग खेल्न आफ्नो प्रमुख टोली घोषणा गरेको छ । दक्षिण अफ्रिकाले सोझै विश्वकपमा स्थान बनाउने उच्च सम्भावना देखिन्छ ।