काठमाडौं (हाम्रो खेलकुद) – कोशी प्रदेशले ललितपुर मेयर्स वुमन्स च्याम्पियनसिप टि२० प्रतियोगितामा मधेश प्रदेशलाई १ सय ६ रनको बलियो लक्ष्य दिएकोेछ । टियु क्रिकेट मैदानमा टस हारेर पहिला ब्याटिङको निम्तो पाएको कोशीले निर्धारित २० ओभरमा ६ विकेट गुमाउँदै १ सय र ५ रन बनायो ।
कोशीकी कप्तान रुविना क्षेत्री बेलबासेले ३८ बलमा ६ चौकासहित सर्वाधिक ३९ रन बनाइन् । अर्की ओपनर काजोल श्रेष्ठ २८ बलमा ४ चौकासहित २२ रनमा आउट भइन् ।
पहिलो विकेटका लागि काजोल र रुविनाले ८.३ ओभरमा ४० रनको साझेदारी गर्दै राम्रो सुरुवात दिलाएका थिए । अप्सरी बेगम ३२ बलमा १ चौकासहित १९ रनमा आउट भइन् ।
युवा खेलाडी स्मृति कटुवालले १२ बलमा १ चौकासहित १०, निशा शाह र सबनम राईले तीन तीन रन बनाए । सोनु राजवंशी २ रनमा अविजित रहिन् ।
मधेशकी सन्तोषी चौधरीले ४ ओभरमा २२ रन खर्चेर २ विकेट लिइन् । अमिरन निशाले ४ ओभरमा १३ रन खर्चेर २ विकेट लिइन् । अमिषा पटेलले ३ ओभरमा १२ रन खर्चेर २ विकेट लिइन् ।
कोशी यस खेलमा विजयी भएमा फाइनलमा पुग्नेछ । पराजित भएमा कोशी, मधेश र सुदूरमध्य एक टोली नेटररनेटको कारण फाइनलमा पुग्नेछन् । एपिएफ ४ खेलमा अपराजित हुँदै फाइनलमा पुगि सकेको छ ।
