काठमाडौं(हाम्रो खेलकुद) – अष्ट्रेलियास्थित सूचना प्रविधि सम्बन्धी कम्पनी एक्स्ट्राटेकले नेपाली यू१९ क्रिकेट टोलीका युवा ओपनर अर्जुन कुमाललाई ५० हजार रुपैयाँ सहयोग गरेको छ । अघिल्लो महिना नेपाललाई यू-१९ विश्वकपमा पुर्याउन महत्वपूर्ण भूमिका खेलेका कुमाललाई संस्थाले नगद ५० हजार सहयोग गरेको हो ।

अष्ट्रेलियाबाट प्राप्त रकम संचारकर्मी मोहन बस्नेतले गुल्मीमा क्रिकेटर कुमाललाई हस्तान्तरण गरेका हुन् । एक्स्ट्राटेकका डाईरेक्टर विनोद कुँवरले कुमालको हौसला बढाउन सहयोग गरिएको बताउँदै यसबाट उनलाई थप प्रेरणाले मिल्ने विश्वास व्यक्त गरे ।

यसअघि पनि विभिन्न खेलाडि र खेल संस्थालाई सहयोग गर्दै आएको एक्स्ट्राटेकले आगामी दिनमा पनि सहयोग जारी राख्ने प्रमुख अफ क्यारियर काउन्सिलर सुदीक्षा गौतमले बताईन् ।

क्रिकेटर कुमालले अहिले आफूलाई विभिन्न व्यक्ति र संस्थाबाट सहयोग प्राप्त भैरहेको र यसबाट आप्नो प्रदर्शनमा थप सुधार ल्याउन प्रेरणा मिलेको बताए । क्रिकेटर अर्जुन कुमाल गुल्मीको छत्रकोटका हुन भने उनलाई सहयोग गर्ने सूचना प्रविधि सम्बन्धी कम्पनी (एक्स्ट्राटेक) का डाईरेक्टर कुँवर पनि गुल्मीको मदानेका स्थायी बासिन्दा हुन् ।

नेपालले अघिल्लो महिना आइसिसी यू-१९ विश्वकप एसिया क्षेत्र छनोटमा घरेलु टोली युएईलाई ७ रनले हराउँदै २०२४ मा श्रीलंकामा हुने यू-१९ विश्वकपको लागि स्थान पक्का गरेको गरेको थियो ।

नेपाली ब्याटिङको भविष्य मानिएका अर्जुनले पुन सानदार प्रदर्शन गरेका थिए । अर्जुनले लगातार उच्च प्रदर्शन गर्दै आएका छन् । यू१९ विश्वकप छनोटमा पनि राम्रो प्रदर्शन गरे । अर्जुन यस प्रतियोगितामा शतक प्रहार गर्ने पहिलो खेलाडी थिए । १७ वर्षीय अर्जुनले कुवेतविरुद्ध १ सय १२ बलमा १२ चौकासहित १ सय ८ रनको शतकीय इनिङ खेलेका थिए ।

अर्जुनले उक्त प्रतियोगितामा ५ खेलमा २१ चौकासहित कुल १ सय ८५ रन बनाउँदै सर्वाधिक रन जोड्ने सूचिमा छैटौं स्थानमा रहे । अर्जुनले घरेलु क्रिकेट भने गण्डकीबाट खेल्दै आएका छन् । अर्जुनले उमेर समूह देखिनै गण्डकीबाट खेल्दै उत्कृष्ट प्रदर्शन गर्दै आएका छन् ।