काठमाडौं (हाम्रो खेलकुद) – नेपाली क्रिकेट टोलीका तीव्र गतिका बलर करण केसीसहित चार क्रिकेटलाई गण्डकी प्रदेशले नदग ५० हजार रुपैयाँसहित सम्मान गरेको छ । करणसँगै नेपाललाई यू-१९ विश्वकपमा पुर्याउन सानदार प्रदर्शन गरेका अर्जुन कुमाल, सुवास भण्डारी र दीपक डुम्रेलाई मंगलबार एक कार्यक्रमका साथ सम्मान गरेको हो ।

नेपाली क्रिकेट टोलीका अलराउन्डर करणले नेपाललाई आइसिसी विश्वकप लिग-२ मा शीर्ष तीनमा रहँदै सोझै विश्वकप छनोटमा पुर्याउनुको साथै आगमी चार वर्ष सम्मलाई ओडिआई मान्यता जोगाउन सानदार प्रदर्शन गरेका थिए । अघिल्लो महिना युएईमा भएको आइसिसी विश्वकप यू-१९ एसिया क्षेत्र छनोटमा नेपाललाई अपराजित रहँदै फाइनलमा पुर्याउन अर्जुन, सुवास र दीपकले उच्च प्रदर्शन गरेका बिथए ।

यी चार क्रिकेटर गण्डकीबाट घरेलु क्रिकेट खेल्ने गर्दछन् । त्यसैले गण्डकीले उनीहरुलाई नगद ५० हजारसहित सम्मान गरेको हो । गण्डकीका मुख्यमन्त्री खगराज अधिकारी, सामाजिक विकास तथा स्वास्थ्य मन्त्री पञ्चराम गुरुङले नगद ५० हजारसहित सम्मान गरेका थिए ।

नेपालका तीव्र गतिका बलर करण केसीले लिग २ मा सानदार प्रदर्शन गर्नेक्रममा ३० खेलमा २१५।५ ओभरम १ हजार १ सय ३ रन खर्चेर ५० विकेट लिए । १५ ओभर मेडन राखेका करणले तीन पटक पाँच विकेट लिए ।

तीन पटक चार विकेट लिएका थिए । करणले गतवर्ष ओमानविरुद्ध दुबै खेलमा पाँच पाँच विकेट लिएका थिए । उनले अघिल्लो महिना नामिबियाविरुद्ध पनि ५ विकेट लिएका थिए ।

त्यस्तै करणले २०२० मा ओमान र अमेरिकाविरुद्ध टियु मैदानमा लगातार दुई पटक चार विकेट लिएका थिए । उनी समग्र लिग २ मै सर्वाधिक विकेट लिने खेलाडीको सूचिमा छैटौं स्थानमा रहे ।

नेपाली ब्याटिङका भविष्य मानिएका अर्जुन कुमालले यू१९ विश्वकप छनोटमा ५ खेलमा २१ चौकासहित कुल १ सय ८५ रन बनाएका थिए । प्रतियोगितामा पहिलो शतक हान्ने खेलाडी बन्नेक्रममा उनले कुवेतविरुद्ध १ सय १२ बलमा १२ चौकासहित १ सय ८ रनको शतकीय इनिङ खेलेका थिए ।

फाइनलका हिरो बनेका स्पिनर सुवास भण्डारीले प्रतियोगिताभर उत्कृष्ट प्रदर्शन गरे । सुवासले ५ खेलमा ७ विकेट लिएका थिए । उनले निर्णायक खेल युएईविरुद्ध दुई महत्वपूर्ण विकेट लिएका थिए ।

यता विकेटकिपर दीपक डुम्रेले ३ खेलमा ३० रन बनाएका थिए । डुम्रेले तल्लोक्रममा ब्याटिङ गर्ने हुँदा कम मौका पाएका थिए । तर उनले फिल्डिङमा र ड्रेसिङ रुममा भने निरन्तर उर्जा दिएका थिए । खेलपछि प्रशिक्षक जगत टमाटाले डुम्रेको प्रसंशा समेत गरेका थिए ।

घरेलु क्रिकेट भने करणले नेपाल पुलिस क्लबबाट खेल्ने गर्दछन् । अर्जुन, सुवास र दीपकले गण्डकीबाट खेल्ने गर्दछन् । यी तीन युवा खेलाडीको प्रदर्शनले गण्डकीले पछिल्लो समय घरेलु क्रिकेटमा प्रभावशाली प्रदर्शन गर्दै आएको छ ।