काठमाडौं (हाम्रो खेलकुद) – नेपालले आइसिसी विश्वकप लिग–२ सिरिजमा तेस्रो स्थानमा रहँदै सोझै विश्वकप छनोटमा स्थान बनायो । भारतमा आगमी अक्टोबर नोभेम्बरमा हुने एकदिवसीय विश्वकपमा पुग्न २०१९ देखि सुरु भएको छनोट यात्रामा लिग २ मा नेपालसहित ७ टोली थिए ।

हरेक टोलीले कुल ३६ खेल खेलेका थिए । ३६ खेलमा नेपालले १९ मा जित र १५ मा हारसहित ४० अंकका साथ शीर्ष तीनमा स्थान अन्त्य गरेको थियो । नेपालले नामिबियालाई एक अंकले पछि पार्दै शीर्ष तीनमा पर्दै जुन जुलाईमा जिम्बावेमा हुने विश्वकप छनोटमा स्थान बनाएको थियो ।

आगमी चार वर्षको लागि ओडिआई मान्यता जोगाउन पनि सफल भयो । नेपालले अन्तिम १२ मध्य ११ खेल जित्दै अविश्वसनीय प्रदर्शन गरेको थियो । मुख्य प्रशिक्षक मोन्टी देशाई र कप्तान रोहित पौडेलको कप्तानीमा नेपालले अद्धभुत प्रदर्शन गरेको थियो ।

नेपालले लिग–२ टियु मैदानबाट खेल्दै टियुमा नै अन्त्य गरेको थियो । नेपालले हारेका अधिकाम्स खेल खराब ब्याटिङकै कारण हारेको थियो । समग्रमा नेपालले खेलेका ३६ खेलबाट पाँच सानदार प्रदर्शन यस प्रकार छन् ।

५. स्कटल्यान्डमाथि ऐतिहासिक जित

नेपालले २०२२ जुलाईमा स्कटल्यान्डमाथि ७ विकेटको ऐतिहासिक जित हात पारेको थियो । उसकै घरेलु भूमिका लिग २ च्याम्पियन तथा एसोसिएट शीर्ष टोली स्कटल्यान्डलाई नेपालले आफ्नो कुनैपनि क्रिकेट खेलमा इतिहासमै पहिलो पटक पराजित गर्न सफल भएको थियो ।

टस हारेर पहिला ब्याटिङको निम्तो पाएको स्कटल्यान्ड नेपालको उत्कृष्ट बलिङ सामु ४२.५ ओभरमा १ सय ४४ रनमा अल आउट भएको थियो । आदिल आलम र सोमपाल कामी ३–३ विकेट लिएपछि स्कटल्यान्ड लिग–२ मा पहिलो पटक १ सय ५० भन्दा कम रनमा समेटिएको थियो ।

आसिफ शेखले ६२ बलमा १० चौका र १ छक्कासहित ७१ रनको सहयोगमा उक्त लक्ष्य नेपालले २५.१ ओभरमा ५ विकेट गुमाउँदै पूरा गरेको थियो । लिग–२ मा नेपालले स्कटल्यान्ड भ्रमणमा जितेको त्यहिँ एक मात्रै खेल थियो ।

४. पपुवा न्युगिनीविरुद्ध अप्रत्याशित जित

नेपाललाई सोझै विश्वकप छनोट खेल्न बाँकी ६ खेल नै जित्नुपर्ने हुन्थ्यो । अघिल्लो महिना दुबई इन्टरनेशल क्रिकेट स्टेडियममा पपुवा न्युगिनीले १ सय ८० रनको विजयी लक्ष्य पछ्याएको नेपाल एक समय ३२ ओभरमा १०५–७ को दयनीय अवस्थामा पुगेको थियो । दुबईको बलिङ सहयोगी कन्डिसन र ठूलो बाउन्ड्री भएको मैदानमा नेपाल हारतर्फ उन्मुख देखिएको थियो ।

सन्दीप लामिछाने र आसिफ शेखले आठौं विकेटका लागि ७७ रनको अविजित साझेदारी गर्दै जित दिलाएका थिए । उक्त खेलमा आसिफ शेख १ सय ३० बलमा २ चौका र १ छक्कासहित ८६ र सन्दीप ३० बलमा ५ चौकासहित ३५ रनमा अविजित रहँदै नेपाललाई रोमान्चक जित दिलाएका थिए ।

विदेशी भूमिमा नेपालले एक यादगार पूनरागमन जित हात पारेको थियो । आसिफ र सन्दीपको जिम्मेवारी तथा धैर्यताले जितेको थियो । नेपाल मात्रै होईन त्यो अवस्थाबाट कुनैपनि टोलीलाई जित निकाल्न कठिन हुन्छ । विपक्षी हाबी बनेको खेलमा नेपालले पूनरागमन जित हात पारेको हुँदा लिग–२ को उत्कृष्ट खेलमा पर्दछ ।

३. अमेरिकासँग रोमान्चक टाई

नेपाली तीन ब्याटरले पहिलो पटक ओडिआईमा एकै पटक अर्धशतक हानेपछि घरेलु टोली अमेरिकाविरुद्ध २ सय ७४ रनमा अल आउट भएको थियो । विदेशी भूमिका नेपालले बनाएको ओडिआईमा सबैभन्दा उच्च योगफल समेत हो । तर प्रमुख हतियार मानिने बलिङ नचलेपछि नेपाल फराकिलो हारतर्फ अघि बढेको थियो ।

अमेरिकाका स्टिभ टेलर १ सय ११ र मोनांक पटेल ८५ रनमा आउट भएका थिए । मोनांक आउट हुँदा अमेरिका ४१.३ ओभरमा २२६–२ को अवस्थमा थियो । उक्त अवस्थाबाट नेपालले टाई गरेको थियो । अमेरिकालाई अन्तिम ६ बलमा जितको लागि ६ रन चाहिएको थियो ।

नेपालले प्रमुख बलर सोमपाल कामी र करण केसीलाई छाडेर आदिल आलमलाई बलिङ दिएको थियो । जुन आफैैंमा सरप्राइज थियो । अमेरिकाको हातमा ६ विकेट थियो । सहज जित निकाल्न सक्ने अनुमान गरिएको थियो । आदिलले जादुमयी प्रदर्शन गर्दै रोमान्चक टाई गराए । चौथो बल नो बल भएपछि अमेरिकालाई अन्तिम दुइ बलमा जितको लागि मात्रै एक रन चाहिएको थियो । हातमा ६ विकेट थियो ।

त्यो कठिन अवस्थाबाट आदिलले पाँचौं बलमा आरोन जोन्सलाई बोल्ड गरे । अन्तिम बलमा राहुल जरिवालालाई रन आउट गर्दै नेपालले नाटकीय टाई गराएका थिए । नेपालले उक्त खेल जित्न नसकेपछि प्रदर्शनको हिसाबमा एक उत्कृष्ट खेल थियो । उक्त खेलमा नेपालका आसिफ शेख ६१, देव खनाल ५४ र रोहित पौडेल ६२ रनमा आउट भएका थिए ।

२. अमेरिका ३५ रनमा अल आउट

नेपालले २०२० फेब्रुअरीमा अमेरिकालाई ३५ रनमा अल आउट गरेको थियो । ओडिआई इहिासमा त्यो सबैभन्दा कम योगफल थियो । २००४ मा श्रीलंकाले जिम्बावेलाई ३५ रनमा अल आउट गरेको थियो ।

नेपालका स्पिनर सन्दीप लामिछाने र सुशान भारीको बलिङ सामु अमेरिका निरिह बनेको थियो । नेपाली स्पिनरले घरेलु कन्डिसनको भरपूर्ण फाइदा उठाए ।

सन्दीपले ६ ओभरमा १ मेडनसहित १६ रन खर्चेर ६ तथा सुशान भारीले १ ओभरमा ५ रन खर्चेर ४ विकेट लिएका थिए । नेपालले आफ्नो मात्रै नभएर विश्व ओडिआई क्रिकेट इतिहासकै एक उत्कृष्ट नतिजा हात पारेको थियो । ५० ओभरको खेलमा ३५ रनमा अल आउट गर्ने कुनै सामान्य कुरा होईन ।

१.नामिबियाविरुद्ध ऐतिहासिक लक्ष्य पूरा

नेपाललाई ओडिआई मान्यता जोगाउन अन्तिम १२ खेलमा ९ मा जित आवश्यक थियो । शीर्ष तीनमा पर्न बाँकी सबै खेल जित्नु पर्दथ्यो । तर पहिलो खेलमा नामिबियाले नेपाललाई २ सय ८५ रनको विशाल लक्ष्य दिएको थियो । माइकल भान लिंगेनले १ सय३३ रनको सानदार शतकीय इनिङ खेलेका थिए ।

धेरैले नेपालले उक्त खेल हार्ने अनुमान गरेका थिए । त्यसअघि नेपालले ओडिआईमा २०१९ मा २ सय ५५ रन मात्रै पूरा गरेको थियो । तर नेपालले घरेलु मैदान, कन्डिसन र दर्शकको भरपूर्ण फाइदा उठाउँदै पहिलो खेलमै सानदार ब्याटिङ गर्यो । कुशल भुर्तेलले १ सय १५ र रोहित पौडेलले ७२ रन जोडेपछि नेपालले उक्त लक्ष्य ४७.४ ओभरमा ७ विकेट गुमाउँदै पूरा गरेको थियो ।

त्यो नेपालको ऐतिहासिक जित मात्रै थिएन ओडिआई मान्यता प्राप्त गर्ने र विश्वकप छनोटमा पुग्ने टर्निङ प्वाइन्ट थियो ।
त्यो खेलपछि खेलाडीको मनोबल बढ्यो । नेपालले पुरै मोमेन्ट कायम गर्यो । सबैभन्दा नेपालले ठूलो योगफल पनि पूरा गर्न सक्छ भन्ने आत्माविश्वास आयो । त्यसैले नेपालले लगातार जित हात पारेको थियो ।