एजेन्सी – सानदार ब्याटिङ प्रदर्शन गरेपनि पपुवा न्युगिनी आइसिसी विश्वकप क्वालिफायर प्लेअफमा घरेलु टोली नामिबियासँग ४८ रनले पराजित भएको छ । आफ्नो ओडिआई इतिहासकै सर्वाधिक रन बनाएपनि पपुवा न्युगिनीले जित निकाल्न सकेन ।

जितको लागि ३ सय ८२ रनको विशाल विजयी लक्ष्य पछ्याएको पपुवा न्युगिनी ४६.२ ओभरमा ३ सय ३३ रनमा अल आउट भयो । पपुवा न्युगिनीका चाल्स अमिनीले ७५ बलमा ८ चौका र ८ छक्कासहित सानदार शतकीय इनिङ खेलेपनि टोलीको हार टार्न सकेनन् । अमिनीको यो ओडिआई करिअरको पहिलो शतक हो ।

पपुवा न्युगिनीले पहिलो पटक ओडिआईमा ३ सय माथि योगफल बनाएको हो । यसअघि पपुवा न्युगिनीको ओडिआईमा उच्च योगफल २०२२ मा नेपालविरुद्ध २ सय ९२ रन थियो । कप्तान असद भाला ६१ बलमा ३ चौका र २ छक्कासहित ५७ तथा सेसे बाउ ४४ बलमा ७ चौका र २ छक्कासहित ५४ रनमा आउट भए । ओपनर किप्लि डोरिगा ३९ बलमा ४ चौका र ३ छक्कासहित ४७ रनमा आउट भए ।

असद भाला र अमिनीले पाँचौं विकेटका लागि १ सय ५३ रनको सानदार शतकीय साझेदारी गरेका थिए । भाला ३८ औं ओभरको पहिलो बलमा गेरार्ड इरास्मसबाट बोल्ड आउट भए । त्यसपछि लगातार विकेट गुमाएपछि पराजित हुन पुगेको थियो । ४० औं ओभरको दोस्रो बलमा अमिनी पनि जेरार्डकै बलमा क्याच आउट भएपछि ऐतिहासिक जितको सम्भावना लगभग सकिएको थियो ।

पपुवा न्युगिनीलाई ४२ बलमा ६८ रन चाहिँदा हातमा चार विकेट थियो । तल्लोक्रमका खेलाडीले राम्रो अन्त्य गर्न नसकेपछि पराजित भएको हो । नामिबियाका बेनार्ड स्कोल्ट्जले १० ओभरमा ६७ रन खर्चेर ३ विकेट लिए । जेरार्ड इरास्मसले ८ ओभरमा १ मेडनसहित ४४ रन खर्चेर २ विकेट लिए ।

त्यसअघि युनाइटेड क्रिकेट ग्राउन्डमा टस हारेर पहिला ब्याटिङको निम्तो पाएको नामिबियाले निर्धारित ५० ओभरमा ८ विकेट गुमाउँदै ३ सय ८१ रन बनाएको थियो । नामिबियाले आफ्नो ओडिआई इतिहासमा बनाएको यो सबैभन्दा ठूलो योगफल हो । यसअघि नामिबियाले ओडिआईमा २०२० मा ओमानविरुद्ध ७ विकेट गुमाउँदै ३ सय २४ रन बनाएको थियो । उक्त कीर्तिमान तोड्दै पहिलो पटक ३ सय ५० माथि योगफल बनाएको हो ।

एसोसियट टोलीको रुपमा नामिबिया ओडिआईमा सर्वाधिक रन बनाउने टोली बनेको छ । नामिबियाले स्कटल्यान्डले २०१८ मा इंग्ल्यान्डविरुद्ध ३ सय ७१ रनको कीर्तिमान तोडेको छ । नामिबियाको जितमा कप्तान जेरार्ड इरास्मसले १ सय १३ बलमा ११ चौका र ५ छक्कासहित १ सय २५ रनको सानदार शतकीय इनिङ खेले ।

जेरार्डको यो ओडिआई करिअरको दोस्रो र उच्च प्रदर्शन हो । एक समय नामिबिया १०-२ को दयनीय अवस्थामा पुगेको थियो । आफ्नो ओडिआई करिअरको दोस्रो खेल खेलेका ओपनर निकोलस डेविनले ७९ बलमा १३ चौका र १ छक्कासहित ९० रनको एक यादगार इनिङ खेलेका थिए । उनी सेमा कमियाबाट एलबीडब्लू आउट भएका थिए ।

तेस्रो विकेटका लागि जेरार्ड र डेविनले १ सय ५१ रनको शतकीय साझेदारी गरेका थिए । चौथो विकेटका लागि जेरार्ड र जान निकोल लोफ्टी इआटनले १ सय ३० रनको सानदार साझेदारी गर्दै विशाल योगफलको आधार तय गरेका थिए ।

निकोल ५९ बलमा ६ चौका र २ छक्कासहित ६१ रनमा आउट भए । विकेटकिपर जेन ग्रीन १६ बलमा ३ चौका र २ छक्कासहित ३२, पिक्की फ्रान्स १४ र रुबेन ट्रम्पलम्यान १७ रनमा आउट भए । कार्ल ब्रिकेनस्टक ८ बलमा १ चौका र २ छक्कासहित १९ रनमा अविजित रहे ।

पपुवा न्युगिनीका तीव्र गतिका बलर सेमा कमियाले १० ओभरमा ६८ रन खर्चेर ५ विकेट लिए । कबुआ मोरिआले ७ ओभरमा ६५ रन खर्चेर २ विकेट लिए । नामिबिया पहिलो खेलमा अमेरिकासँग ८० रनले पराजित भएको थियो । नामिबियाले बिहीबार जर्सीसँग खेल्नेछ । पपुवा न्युगिनीको लगातार दोस्रो हार पपुवा न्युगिनी पहिलो खेलमा युएईसँग २१ रनले पराजित भएको थियो । पपुवा न्युगिनीले शनिबार जर्सीसँग खेल्नेछ ।

प्लेअफमा लिग(२ का पुछारका चार टोली घरेलु टोली नामिबिया, अमेरिका, युएई, पपुवा न्युगिनीसँगै च्यालेन्ज लिग ए, बी का विजेता क्यानडा र जर्सी गरि कुल ६ टोली छन् । हरेक टोलीले एक अर्कासँग खेल्नेछन् । शीर्ष दुई टोलीले आगमी जुन जुलाईमा जिम्बावेमा हुने विश्वकप छनोटमा स्थान बनाउनेछन् ।

नामिबिया र अमेरिकाले लिग-२ बाट नै ओडिआई मान्यता जोगाई सकेका छन् । युएई र पपुवा न्युगिनीलाई ओडिआई मान्यता जोगाउन जर्सी र क्यानडालाई पछि पार्नुपर्ने हुन्छ ।

अन्यथा चार वर्षको लागि ओडिआई गुम्नेछ । विश्वकप छनोटमा लिग-२ का शीर्ष तीन टोली नेपाल, स्कटल्यान्ड, ओमानसँगै प्लेअफका शीर्ष दुई र सुपर लिगका पाँच टोली हुनेछन् । १० टोलीलाई दुई समूहमा विभाजन गरिनेछ । सुपर सिक्स हुँदै शीर्ष दुईमा रहने टोलीले मात्रै भारतमा अक्टोबर नोभेम्बरमा हुने विश्वकप खेल्न पाउनेछन् ।