एजेन्सी – मध्यक्रमका ब्याटर आसिफ खानको सानदार शतकमा युएईले आइसिसी विश्वकप क्वालिफायर प्लेअफमा अमेरिकालाई २ सय ८० रनको बलियो लक्ष्य दिएको छ । युनाइटेड क्रिकेट क्लब ग्राउन्डमा टस जितेर पहिला ब्याटिङ रोजेको युएईले निर्धारित ५० ओभरमा ९ विकेट गुमाउँदै २ सय ७९ रन बनायो ।

युएईका आसिफ खानले ८४ बलमा ९ चौका र २ छक्कासहित १ सय ३ रनको सानदार शतकीय इनिङ खेले । आसिफले ८१ बलमा करिअरको दोस्रो शतक पूरा गरेका थिए । दुई साता अघि आसिफले लिग-२ को अन्तिम खेलमा नेपालविरुद्ध टियु मैदानमा ११ छक्कासहित ४१ बलमै शतक हानेका थिए । उनको यो करिअरको दोस्रो शतक हो । उच्च लयलाई निरन्तरता दिँदै शतक हानेका हुन् ।

युवा ब्याटर वृत्य अरविन्द ६८ बलमा ६ चौका र १ छक्कासहित ५७ रनमा आउट भए । अन्य ब्याटरले भने राम्रो गर्न सकेनन् । ओपनर मोहम्मद वासिम २ र आर्यन लाक्रा २६ रनमा आउट भएका थिए । रोहन मुस्तफा ५३ बलमा १ चौका र २ छक्कासहित ३८ रनमा रन आउट भए । जुनैद सिद्दिक ११ बलमा १ चौका र १ छक्कासहित १६ रनमा अविजित रहे ।

अमेरिकाका निसर्ग पटेलले १० ओभरमा १ मेडनसहित ३५ रन खर्चेर २ विकेट लिए । जेसी सिंहले १० ओभरमा ५४ रन खर्चेर २ विकेट लिए । सौरभ नेत्रवालकर र अली खानले एक एक विकेट लिए ।

प्लेअफ क्वालिफायरमा अमेरिका, नामिबिया, क्यानडा, जर्सी, युएई र पपुवा न्युगिनी छन् । शीर्ष दुई टोलीले विश्वकप छनोटमा स्थान बनाउनेछन् । क्यानडा, जर्सी, युएई र पपुवा न्युगिनी मध्य शीर्ष दुई टोलीले ओडिआई मान्यता प्राप्त गर्नेछन् । ओडिआई मान्यताको लागि यी चार टोलीबीचको प्रदर्शनलाई हेरिनेछ ।

नामिबिया र अमेरिकाले ओडिआई मान्यता लिग २ बाट बचाएका थिए । ओडिआई मान्यताको लागि अमेरिका र नामिबियासँगको खेलले भने बाँकी चार टोलीलाई फरक पर्ने छैन । युएई लगातार दोस्रो जित निकाल्न चाहन्छ । युएईले पहिलो खेलमा पपुवा न्युगिनीलाई २१ रनले हराएको थियो । पपुवा न्युगिनीलाई हराउन आयन खान अफ्जलले ९४ रनको सानदार प्रदर्शन गरेका थिए । युएईले ओडिआई मान्यता जोगाउन कम्तिमा जर्सी र क्यानडालाई पछि पार्नुपर्ने हुन्छ ।