काठमाडौं (हाम्रो खेलकुद) – नेपाली महिला क्रिकेट टोलीकी कप्तान रुविना क्षेत्री बेलबासेले र अनुभवी खेलाडी सीता रानामगर हङकङमा हुने दोस्रो संस्करणको फेयर ब्रेक इन्भिटेसनल टि२० प्रतियोगिता खेल्न त्यसतर्फ लागेका छन् । रुविना र सीता शुक्रबार दिउँसो त्यसतर्फ लागेका हुन् ।
रुविनालाई द बर्मी आर्मी र सीतालाई टोर्नाडोस वुमेन्सले रिटेन गरेका थिए । गतवर्ष रुविनाले दुई खेल मात्रै खेल्ने अवसर पाएकी थिइन् । उनले ब्याटिङमा कुनैपनि मौका नपाउँदा बलिङमा एक इनिङमा २ ओभर बलिङ गर्दै २० रन खर्चेकी थिईन् ।
सीता सम्मिलित टोर्नाडोसले गत वर्ष दुबईमा भएको फाइनलमा फाल्कोन्स वुमन्सलाई ८ विकेटले हराउँदै टोर्नाडोस च्याम्पियन बनेको हो । त्यस प्रतियोगितामा सीताले ७ खेलमा ४ विकेट लिँदा २२ रन बनाएकी थिइन् । त्यस समय सीताले गरेको ‘पुष्पा’ सेलेब्रेसनले पनि निकै चर्चा पाएको थियो । प्रतियोगिता आगमी अप्रिल ३ देखि १६ अप्रिल सम्म हुनेछ ।
बिहीबार मात्रै सीता र रुविनाले ललितपुर मेयर्स वुमन्स च्याम्पियनसिप २०२३ को फाइनल खेलेका थिए । सीताको कप्तानीमा नेपाल एपिएफ क्लबले कोशी प्रदेशलाई हराउँदै उपाधि जितेको थियो ।
एपिएफलाई लगातार तेस्रो पटक च्याम्पियन बनाउन सानदार अलराउन्ड प्रदर्शन गरेकी सीता प्लेयर अफ द टुनामेन्ट (सर्वोत्कृष्ट) खेलाडी चुनिएकी थिइन् । सीताले ५ खेलमा २ अर्धशतकसहित कुल २ सय १४ रन बनाउनुको साथै ८ विकेट लिइकी थिइन् । रुविनाले ५ खेलमा १ सय ३९ रन बनाउनुको साथै ६ विकेट लिएकी थिइन् ।
