एजेन्सी – इन्डियन प्रिमियर लिग (आइपिएल) २०२३ सुरु हुनुअघि नै ८ फ्रेन्चाइज टोलीका १३ खेलाडी घाइते भई सकेका छन् । आइपिएल शुक्रबार देखि भारतमा सुरु हुँदैछ । १० टोली सहभागी प्रतियोगितामा सनराइजर्स हैदराबाद र गुजरात टाइटन्स बाहेक अन्य सबै फ्रेन्चाइज टोलीका खेलाडी घाइते भएका छन् ।

यसले टिम समिकरण र प्रदर्शनमा ठूलो असर पर्ने देखिन्छ । घाइते १३ मध्य ७ खेलाडीले आइपिएल पुरै गुमाउने पक्का भएको छ । जसमध्य ७ तीव्र गतिका बलर घाइते भएका छन् । आइपिएलमा घाइते भएका हालसम्मका १३ खेलाडी यस प्रकार छन् ।

१.रोयल च्यालेन्जर्स बेंगलोर

रजत पाटिदार – बेंगलोरका मध्यक्रमका प्रमुख ब्याटर रजत पाटिदार खुट्टाको कुर्कुच्चामा चोटका कारण आधा सिजन गुमाउने छन् । उनी नहुँदा मध्यक्रममा असर पर्ने देखिन्छ ।

विल ज्याक्स – इंग्ल्यान्डका अलराउन्डर विल ज्याक्स खुट्टाको मांशपेशी (मशलमा) चोटका कारण आइपिएल गुमाई सकेका छन् । स्पिन अलराउन्डर ज्याक्स आक्रामक ब्याटिङका लागि चिनिन्छन् ।

गत डिसेम्बरमा बेंगलोरले अक्सनमा उनलाई ३ करोड २० लाख भारुमा किनेको थियो । ज्याक्स गुमाउने भएपछि बेंगलोरले न्युजिल्यान्डका स्पिन अलराउन्डर माइकल ब्रसवेललाई टोलीमा भित्र्याएको छ । ब्रेसवेलले तल्लोक्रममा राम्रो ब्याटिङको क्षमता राख्छन् ।

जोश हेजलवुड – तीव्र गतिका बलर जोश हेजलवुडले पनि चोटका कारण सुरुवाती केहि खेल गुमाउने भएका छन् । उनको खुट्टामा चोट लागेको छ ।

२.राजस्थान रोयल्स :

प्रसिद्ध कृष्णा- राजस्थान रोयल्सका तीव्र गतिका बलर प्रसिद्ध कृष्णाको मेरुदण्डमा चोटका कारण आइपिएल गुमाएका छन् । प्रसिद्धको स्थानमा राजस्थान सन्दीप शर्मालाई मौका दिएको छ ।

३.पन्जाब किंग्स :

जोनी बेयरस्टो – इंग्ल्यान्डका आक्रामक जोनी बेयरस्टो पनि आइपिएलबाट बाहिर सकेका छन् । गल्फ खेल्दा खुट्टामा लागेको चोट ठिक नहुँदा बेयरस्टो बाहिरि सकेका छन् । उनको स्थानमा अष्ट्रेलिया म्याथ्यु शर्टलाई मौका दिएको छ ।

लियाम लिभिङस्टोन : विष्फोटक ब्याटर लियाम लिभिङस्टोनले घुँडामा चोटका कारण शनिबार कोलकता नाइट राइडर्सविरुद्ध खेल गुमाउने पक्का भएको छ ।

४.मुम्बई इन्डियन्स :

जस्प्रित बुमराह– भारतीय क्रिकेट टोलीका प्रमुख बलर जस्प्रित बुमराह ब्याक इन्जुरीको कारण आइपिएल नखेल्ने भएका छन् । लामो समयदेखि उनी ब्याक इन्जुरीबाट संघर्ष गर्दै आएका छन् । बुमराहको स्थानमा मुम्बईले बुमराहको स्थानमा सन्दीप वारियरलाई मौका दिएको छ ।

झेय रिचर्ड्सन- मुम्बईका अर्का तीव्र गतिका बलर झेय रिचर्ड्सनले पनि ह्यामस्ट्रिङमा चोटका कारण पुरै सिजन गुमाउने भएका छन् । उनको स्थानमा पनि मुम्बईले अर्को खेलाडी लिएको छैन ।

५.लखनउ सुपर जायन्ट्स :

मोहसिन खान – तीव्र गतिका बल मोहसिन खानले काँधमा चोटका कारण आइपिएलको लिगको सबै खेल गुमाउने भएका छन् ।

६. कोलकता नाइट राइडर्स :

श्रेयस ऐर : कोलकताका कप्तान श्रेयस ऐरले पनि आइपिएलको आधा सिजन गुमाउने भएका छन् । मेरुदण्डको तल्लो भागमा चोटका कारण ऐरले आधा सिजन गुमाउने भएका छन् । त्यसैको कारण कोलकताले कार्यवाहक कप्तान नितिश राणालाई दिएको छ ।

दिल्ली क्यापिटल्स :

ऋषभ पन्त : दिल्लीका विकेटकिपर तथा कप्तान ऋषभ पन्त गत डिसेम्बरमा कार दुर्घटनामा पनि गम्भीर घाइते भएका थिए । पन्तको स्थानमा दिल्लीले २० वर्षीय अभिषेक पोरेललाई टोलीमा मौका दिएको छ ।

८.चेन्नई सुपर किंग्स :

काइल जेमिसन – तीव्र गतिका बलिङ अलराउन्डर काइल जेमिसन ब्याक इन्जुरीकै कारण पुरै सिजन गुमाउने भएका छन् । उनको स्थानमा चेन्नईले दक्षिण अफ्रिका तीव्र गतिका बलर सिसान्डा मगलालाई टोलीमा लिएको छ ।

मुकेश चौधरी- बायाँ हाते तीव्र गतिका बलर मुकेश चौधरी पनि ब्याक इन्जुरीकै कारण आइपिएल गुमाउने भएका छन् । उनको स्थानमा चेन्नईले २० वर्षीय अभिनाश सिंहलाई टोलीमा समेटेको छ ।