एजेन्सी – नामिबियामा जारी आइसिसी विश्वकप क्वालिफायर प्लेअफ प्रतियोगितामा आज दुई महत्वपूर्ण खेलहरु हुँदैछन् । आज युएईले क्यानडासँग खेल्दैछ । अर्को खेलमा जर्सी र पपुवा न्युगिनीबीच प्रतिस्पर्धा हुनेछ । दुबै खेल दिउँसो १ : १५ मा सुरुहुनेछन् ।

जर्सी, क्यानडा, युएई र पपुवा न्युगिनी मध्य दुई टोलीले ओडिआई मान्यता प्राप्त गर्नेछन् । आजको खेलमा क्यानडा विजयी भएमा ओडिआई मान्यताको सम्भावना उच्च बन्नेछ । युएई पराजित हुँदा ओडिआई मान्यता जोगाउन कठिन पर्नेछ । उता पपुवा न्युगिनी र जर्सीबीचको खेलमा पराजित हुने टोलीको ओडिआई मान्यता सम्भावना समाप्त हुनेछ ।

प्रतियोगितामा नामिबिया, अमेरिका, जर्सी, क्यानडा, पपुवा न्युगिनी र युएई छन् । शीर्ष दुई टोलीले आगमी जुन जुलाईमा जिम्बावेमा हुने विश्वकप छनोट खेल्न पाउनेछन् । नामिबिया र अमेरिकाले लिग-२ बाट नै ओडिआई जोगाएका थिए ।

ओडिआई मान्यताको लागि यी दुई देशसँगको प्रदर्शन र नतिजाले अन्य चार टोलीलाई फरक पर्ने छैन । ओडिआई मान्यता जर्सी, क्यानडा, युएई र पपुवा न्युगिनीबीचको प्रदर्शनको आधारमा निर्धारण गरिनेछ ।

क्यानडाले जर्सीलाई ३१ रन र अमेरिकालाई २६ रनले हराएको थियो । ओडिआई मान्यताको लागि अमेरिकाको नतिजा भने फरक पर्दैन । क्यानडाले युएईपछि नामिबिया र पपुवा न्युगिनीसँग खेल्नेछ । त्यसैले आज जितेको खण्डमा ओडिआई सम्भावना मजबुत हुनेछ ।

उता युएईले पहिलो खेलमा पपुवा न्युगिनीलाई २१ रनले हराएको थियो । अमेरिकासँग ५ विकेटले पराजित भएको थियो । ओडिआई मान्यता जोगाउन र विश्वकप छनोटमा पुग्ने आशा कायमै राख्न आजको खेल जित्नै पर्ने हुन्छ ।

युएईका आसिफ खानले पछिल्लो खेलमा अमेरिकाविरुद्ध शतक हानेका थिए । पपुवा न्युगिनीविरुद्ध मोहम्मद वासिम र आयन खानले उत्कृष्ट प्रदर्शन गरेका थिए । तर बलिङ भने दुबै खेलमा राम्रो गर्न सकेको छैन ।

अमेरिकाविरुद्ध २ सय ७९ रन बनाएपनि युएई पराजित भएको थियो । तीव्र गतिका बलर जुनैद सिद्दिक र जहुर खानबाट उत्कृष्ट प्रदर्शन चाहन्छ । वृत्य अरविन्द, रोहन मुस्तफा र रमिज शाहजादबाट सानदार प्रदर्शन चाहन्छ । ओडिआई मान्यताको लागि युएईलाई यो खेल निर्णायक सावित हुनसक्छ । त्यसैले युएईले आफ्नो शतप्रतिशत दिएर खेल्नेछ ।

उता छिमेकी मुलुक अमेरिकालाई हराएको क्यानडाको मनोबल भने उच्च छ । क्यानडाका श्रीमन्था विजयरत्ने प्रमुख ब्याटर हुन् । अमेरिकालाई हराउन निकोलस किर्टोन र हर्षले उच्च प्रदर्शन गरेका थिए । अष्ट्रेलियन म्याथ्यु स्पोर्सबाट उत्कृष्ट प्रदर्शन चाहन्छ । दुई पाकिस्तानी मुलका बलर साद विन जाफर र कलिम सानाको प्रदर्शन निकै महत्वपूर्ण हुनेछ ।

उता जर्सी र पपुवा न्युगिनी खेल्दैछन् । पपुवा न्युगिनीले नामिबियाले दिएको ३ सय ८२ रनको विशाल लक्ष्य पछ्याउनेक्रममा ३ सय ३३ रन बनाएको थियो । उक्त खेलमा चाल्स अमिनीले ७५ बलमा ८ चौका र ८ छक्कासहित सानदार शतकीय इनिङ खेलेका थिए । किप्लिङ डोरिगा ४७, सेसे बाउ ५४ र असाद भाला ५७ रनमा आउट भएका थिए ।

पहिलो खेलमा युएईविरुद्ध २ सय ६० रनको विजयी लक्ष्य पछ्याउनेक्रममा २ सय ३९ रन बनाएको थियो । ओपनर किप्लिङ डोरिगा र टोनी उराले २०.३ ओभरमा १ सय ४६ रनको विष्फोटक शतकीय साझेदारी गरेका थिए । दुबै खेलमा सानदार प्रदर्शन गरेको पपुवा न्युगिनीलाई ओडिआई बचाउन आजको खेल जित्नै पर्ने हुन्छ । आजको खेलमा हार्दा ओडिआई गुम्ने लगभग पक्कापक्की नै हुनेछ ।

यता जर्सीमा इंग्ल्यान्ड र न्युजिल्यान्डका मुलका खेलाडी छन् । नामिबियाविरुद्ध ७६ रनको इनिङ खेलेका जोन्टी जेनर पपुवा न्युगिनीलाई घातक बन्नसक्छन् । उनीसँग इंग्ल्यान्डको काउन्टी खेलेको अनुभव छ । न्युजिल्यान्डबाट घरेलु क्रिकेट खेल्ने निक ग्रीनवुड पनि राम्रो ब्याटिङ गर्दछन् । बेन्जामिन वार्ड प्रमुख बलर हुन् ।

अंक तालिका

क्यानडा २ खेलमा ४ अंकका साथ नेटरनरेटको कारण शीर्ष स्थानमा छ । नामिबिया र अमेरिकाको समान ३ खेलमा ४-४ अंक भएपनि नेटरनरेटको कारण दोस्रो र तेस्रो स्थानमा छन् । युएई २ खेलमा १ मा जित र १ मा हारसहित २ अंकका साथ चौथो स्थानमा छ । पपुवा न्युगिनी र जर्सी समान दुई खेलमा जित विहीन हुँदै पाँचौं र पुछारमा छन् ।