एजेन्सी – तीव्र गतिका बलर मार्क वुडको घातक बलिङ गर्दै पाँच विकेट लिएपछि लखनऊ सुपर जायन्ट्सले इन्डियन प्रिमियर लिग (आइपिएल) २०२३ मा दिल्ली क्यापिटल्सलाई ५० रनले हराउँदै सानदार विजयी सुरुवात गरेको छ ।

जितको लागि १ सय ९४ रनको विशाल विजयी लक्ष्य पछ्याएको दिल्लीले निर्धारित २० ओभरमा ९ विकेट गुमाउँदै १ सय ४३ रन बनायो । दिल्लीका कप्तान डेविड वार्नरले ४८ बलमा ७ चौकासहित सर्वाधिक ५६ रन बनाए ।

तर वार्नरको उक्त अर्धशतक जितको लागि पर्याप्त हुन सकेन । वार्नर पावर प्लेमा आक्रामक रुपमा प्रस्तुत भएपनि त्यसपछि खुलेर खेल्न सकेनन् ।

दिल्लीलाई ओपनर पृथ्वी शा र वार्नरले पहिलो विकेटका लागि ४.३ ओभरमा ४१ रन जोड्दै उत्कृष्ट सुरुवात दिलाएका थिए । तीव्र गतिका बलर मार्क वुडले पाँचौं ओभरको तेस्रो बलमा शालाई १२ रनमा बोल्ड गरे ।

लगत्तै अर्को बलमा मिचेल मार्श पनि बोल्ड भएपछि लखनऊ खेलमा हाबी बनेको थियो । वुडको गतिमा फ्याँलेको लाइनको बल दुबै ब्याटरले चाल पाउन नसक्दा बोल्ड भएका थिए ।

दुई बलमा दुई प्रमुख ब्याटर आउट भएपछि दिल्ली खेलमा दबाबमा परेको थियो । वुडको सातौं ओभरको अन्तिम बलमा शरफराज खान ४ रनमा कृष्णप्पा गौतमबाट क्याच आउट भए ।

बाउन्सर बल उत्कृष्ट उपरकट लगाएपनि उनी बच्न सकेनन् । स्पिनर रवि विश्रोईको १२ औं ओभरको अन्तिम बलमा राइली रोसोउ ३० रनमा क्याच आउट भएपछि जितको सम्भावना लगभग टाढिएको थियो ।

रोसोउले २० बलमा ३ चौका र १ छक्का प्रहार गरे । रोभम्यान पावेल विश्रोईको बलमा एक रनमा एलबीडब्लू आउट भए । अक्षर पटेल ११ बलमा १ चौका र १ छक्कासहित १६ रनमा आउट भए ।

लखनऊको जितमा मार्क वुडले ४ ओभरमा १४ रन खर्चेर सर्वाधिक ५ विकेट लिए । वुड आइपिएल २०२३ मा पाँच विकेट लिने पहिलो खेलाडी हुन् । रवि विश्रोईले ४ ओभरमा ३१ रन खर्चेर २ विकेट लिए । आवेश खानले ४ ओभरमा २९ रन खर्चेर २ विकेट लिए ।

त्यसअघि टस हारेर पहिला ब्याटिङको निम्तो पाएको घरेलु टोली लखनऊले निर्धारित २० ओभरमा ६ विकेट गुमाउँदै १ सय ९३ रन बनाएको थियो । लखनऊको जितमा ओपनर काइल मेयर्सले ३८ बलमा २ चौका र ७ छक्कासहित ७३ रनको उत्कृष्ट इनिङ खेले ।

मेयर्स स्पिनर अक्षर पटेलको १२ औं ओभरको तेस्रो बलमा टर्न हुँदा बोल्ड भए । टर्न बल मेयर्सले चाल पाउन सकेनन् । त्यसअघि मेयर्सले ब्यक्तिगत १६ रनमा जीवनदान पाएका थिए ।

चेतनको छैटौं ओभरको तेस्रो बलमा खलिल अहमदले सहज क्याच छाड्दै जीवनदान दिएका थिए । उक्त जीवनदान दिल्लीलाई भारी पर्यो । ओपनर तथा कप्तान लोकेश राहुल १२ बलमा १ छक्कासहित ८ रनमा क्याच आउट भएका थिए । युवा विकेटकिपर निकोलस पुरन २१ बलमा २ चौका र ३ छक्कासहित ३६ रन बनाउँदै आउट भए ।

दीपक हुँडा १७, क्रुनाल पान्ड्या १४ र मार्कस स्टोइनिस १२ रनमा आउट भए । अन्तिम तिर ब्याटिङमा आएका युवा ब्याटर आयुष बदोनी ७ बलमा १ चौका र २ छक्कासहित १८ रनमा आउट भएका थिए । इम्प्याक्ट प्लेयरको रुपमा अन्तिम बलमा मैदान आएका कृष्णप्पा गौतमले छक्का प्रहार गदै इनिङ सकाए ।

दिल्लीका खलिल अहमदले ४ ओभरमा ३० रन खर्चेर २ विकेट लिए । चेतन सकारियाले ४ ओभरमा ५३ रन खर्चेर २ विकेट लिए । कुलदीप यादवले ४ ओभरमा ३५ र अक्षर पटेलले ४ ओभरमा ३८ रन खर्चेर समान १-१ विकेट लिए । दिल्लीले आफ्नो दोस्रो खेल मंगलबार गुजरात टाइटन्ससँग खेल्नेछ ।

लखनऊले सोमबार चेन्नई सुपर किंग्ससँग खेल्नेछ । आजको पहिलो खेलमा पन्जाब किंग्सले कोलकाता नाइट राइडर्सलाई डिएसएल मेथर्डमा ७ रनले हराएको थियो ।

आइपिएलमा आइतबार पनि दुई खेल हुनेछन् । पहिलो खेलमा दिउँसो ३ : ४५ मा राजस्थान रोयल्स र सनराइजर्स हैदराबादबीच प्रतिस्पर्धा हुनेछ । बेलुका ७ : ४५ मा रोयल च्यालेन्जसं बेंगलोर र मुम्बई इन्डियन्सबीच प्रतिस्पर्धा हुनेछ ।